މިއީ ހަމާސް އާއި އިސްރާއީލު ސިފައިންނާ ދެމެދު ކުރިޔަށްދާ ހަނގުރާމައިގެ 45 ވަނަ ދުވަސް، 20 ނޮވެމްބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴  ވައިޓް ހައުސް އިން ހާމަކޮށްފައިވާ ގޮތުގައި ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލުމުގެ މަޝްވަރާތަކަށް ކުރިއެރުންތައް ލިބިފައިވޭ. ނަމަވެސް އެއްވެސް ކަމެއް އަދި ފައިނަލް ނުވޭ.

🔴 ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލުމާ ގުޅޭ ގޮތުން ރެޑް ކްރޮސްގެ ރައީސް މިރްޖާނާ ސްޕޮލްޖަރިޗް އެގާރ ވަނީ ހަމާސްގެ ލީޑަރު އިސްމައިލް ހަނިޔޭ އާ ބައްދަލުކޮށްފަ. މީގެ އިތުރުން، ޤަތަރުގެ ސަރުކާރާވެސް މި މައްސަލައާ ގުޅޭގޮތުން އެގާރ މަޝްވަރާ ކުރުމަށް ވަނީ ހަމަޖެހިފައި.

🔴 އިސްރާއީލް-ހަމާސް ގެ ހަނގުރާމަ 7 އޮކްޓޯބަރުގައި ފެށިފަހުން މިހާތަނަށް 50 ނޫސްވެރިއަކު މަރުވެފައިވާކަމަށް ނޫސްވެރިން ރައްކާތެރިކުރާ ކޮމިޓީ، "ކޮމިޓީ ޓު ޕްރޮޓެކްޓް ޖާނަލިސްޓްސް" އިން ބުނެފި. މީގެ ތެރޭގައި ފަލަސްތީނުގެ 45 ނޫސްވެރިއަކާއި، އިސްރާއީލުގެ 4 ނޫސްވެރިއަކާއި އަދި ލުބުނާނުގެ ނޫސްވެރިއަކު ހިމެނޭ.

🔴 ޣައްޒާގައި  ހުންނަ "އިންޑޮނޭޝިއަން ހޮސްޕިޓަލް" އަށް ދިން ހަމަލާއަކީ ވެސް އަލް-ޝިފާ ހޮސްޕިޓަލަށް ދިން ވަރުގެ ނުރައްކާތެރި ހަމަލާތަކެއްކަމަށް ޣައްޒާ ހެލްތު މިނިސްޓްރީގެ ތަރުޖަމާނު ބުނެފި. އަދި އެ ހޮސްޕިޓަލަށް ހަމަލާ ދޭން ފެށުމުގެ ކުރިން ރެޑް ކްރޮސްގެ އެހީގައި 200 ބަލިމީހުން ހޮސްޕިޓަލުން ނެރެވުނުކަމަށް ވެސް މައުލޫމާތު ދީފައިވޭ.

🔴 ރިޕޯޓުތައް ބުނާ ގޮތުން އަލް-ޝިފާ ހޮސްޕިޓަލަށް ދެމުން ގެންދާ ހަމަލާތަކަށް އަދިވެސް ހުއްޓުމެއް ނާދޭ. އަދި ހޮސްޕިޓަލް ތެރޭގައި ތާށިވެފައި ތިބި މީހުންނަށް ނުނިކުމެވިފައިތިބީ ، ހޮސްޕިޓަލުގެ ބޭރުތެރެ ނާމާންކަމުންކަމަށް (އިސްރާއީލް ސިފައިންގެ ހަމަލާތަކުން) ވެސް މަޢުލޫމާތު ލިބޭ.

🔴 100 ސެނެޓަރުން ތިބޭ އެމެރިކާ ސެނެޓުގެ ދެވަނަ ސެނެޓަރަކު ޣައްޒާ ހަނގުރާމަ ހުއްޓާލުމަށް ގޮވާލައިފި. ކުރިން މިކަމަށް ގޮވާލާފައިވަނީ ސެނެޓަރ ރިޗަޑް ޑާރބިން.