އާ ސަރުކާރުގެ ހައުސިން މިނިސްޓަރު ޑރ. އަލީ ހައިދަރު އަހްމަދަށް ރުހުން ދޭން ދެކޮޅު ހައްދަވައި އެ ގޮތަށްް އެމްޑީޕީގެ ޕާލަމެންޓްރީ ގްރޫޕުން ނިންމައިދޭން ގަލޮޅު ދެކުނު ދާއިރާގެ މެންބަރު މީކާއިލް ނަސީމް އެދިވަޑައިގެންފިއެވެ. މީކާއިލް މިގޮތަށް އެދިވަޑައިގަތީ ނިމިދިޔަ ސަރުކާރުގައި ފްލެޓް ދޭން ނިންމި ލިސްޓް ރިވިއުކުރާނެ ކަމަށް މިހާރުގެ ހައުސިން މިނިސްޓަރ ވިދާޅުވުމާ ގުޅިގެން މިއަދު މަޖިލީހުގައި ވާހަކަދައްކަވަމުންނެވެ.

މަޖިލީހުގައި މިއަދު ފެށި ބަޖެޓް ބަހުސްގައި މީކާއިލް ވިދާޅުވީ، ފެނިގެން ދަނީ މާލޭ ސަރަހައްދުގެ ބޯހިޔާވަހިކަން ފޭރިގަންނަން މަސައްކަތް ކުރަމުންދާ މަންޒަރު ކަމަށެވެ.

"އިއްޔެ މި ސަރުކާރުގެ ހައުސިން މިނިސްޓަރު ދެއްވި ޕްރެސް ކޮންފަރެންސުން އެމަނިކުފާނު އަމިއްލަފުޅަށް އިއުތިރާފުވެވަޑައިގަންނަވަނީ ވެރިކަން ހޯދުމުގެ ބޭނުމުގައި ތިމަންނާމެން އެ ދުވަހު ހެދީ ދޮގޭ،" މީކާއިލް ވިދާޅުވިއެވެ.

Advertisement

މީކާއިލް ވިދާޅުވީ، މިހާރުގެ ހައުސިން މިނިސްޓަރަށް އޭނާގެ ރުހުން ނުލިބޭނެކަމަށެވެ. 

"މި ހައުސިން މިނިސްޓަރަށް ގްރީން ދިނުމަށް ތްރީލައިން ވިޕެއް އަޅުއްވަން ނަހައްދަވާ. ހަމަގައިމު ވެސް އަޅުގަނޑުގެ ވޯޓެއް މި ހައުސިން މިނިސްޓަރަށް ރުހުން ދިނުމަކަށް ވޯޓެއް ނުދޭނަން." މީކާއިލް ވިދާޅުވިއެވެ.

މާލޭގެ ރައްޔިތަކަށް ދޭން ނިންމާފައިވާ ބޯހިޔާވަހިކަމުގެ އެއްވެސް ކަމަކަށް ބަދަލެއް ނުގެންނާނެ ކަމަށް ރައީސް ޑރ. މުހައްމަދު މުއިއްޒު އިންތިހާބު ދުވަސްވަރު ވިދާޅުވެފައިވާ ވާހަކަ ފާހަގަކުރައްވައި މީކާއިލް ވިދާޅުވީ، 2 ވަނަ ބުރާ ހަމައަށް ކުރެއްވި ކަންކަމަށް އިހުތިރާމް ނުކުރާނެ ކަމަށް ހައުސިން މިނިސްޓަރު ވިދާޅުވެފައިވާ ކަމަށެވެ.