ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޒީރުންގެ މަޖިލީހަށް މެމްބަރުން ޢައްޔަނުކުރެއްވުމާއި އެކު ރައްޔިތުންގެ މަޖިލީހުގެ ބައެއް ދާއިރާތަކުގެ ގޮނޑި ހުސްވެއްޖެއެވެ.

މިގޮތުން އައު ސަރުކާރާއި އެކު ރައްޔިތުންގެ މަޖިލީހުގެ 6 ދާއިރާއެއްގެ ގޮނޑި ވަނީ ހުސްވެފައެވެ. މީގެ ތެރޭގައި ރައްޔިތުންގެ މަޖިލީހުގެ ފަރެސްމާތޮޑާގެ ގޮނޑިވެސް ހިމެނެއެވެ. އެގޮނޑި ހުސްވީ، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރުގެ ގޮތުގައި ހުންނެވި، އަލްއުސްތާޛު ޙުސައިން މުޙައްމަދު ލަޠީފު ރައީސުލްޖުމްހޫރިއްޔާގެ ނައިބުގެ މަޤާމަށް އިންތިޚާބުވެވަޑައިގެން އެމަޤާމުގެ ހުވައިކުރެއްވުމަށް މަޤާމުން އިސްތިއުފާ ދެއްވުމުންނެވެ.

ގޮނޑިތައް ހުސްވި ދާއިރާ ތަކަކީ،

1- ރައްޔިތުންގެ މަޖިލީހުގެ ވިލިމާލެ ދާއިރާ،

ވިލިމާލެ ދާއިރާގެ ގޮނޑި ފުރުއްވަމުން ގެންދެވި، އަހުމަދު އުޝާމް މިއަދު ބަންޑާރަ ނައިބުގެ މަޤާމަށް ރައީސުލްޖުމްހޫރިއްޔާ ވަނީ ޢައްޔަނުކުރައްވާފައެވެ.

2- ރައްޔިތުންގެ މަޖިލީހުގެ މާވަށު ދާއިރާ،

މާވަށު ދާއިރާގެ ގޮނޑި ފުރުއްވަމުން ގެންދެވި، މުޙައްމަދު ސަޢީދު، ރައީސުލްޖުމްހޫރިއްޔާ މިއަދު ވަނީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގެ މަގާމަށް ޢައްޔަނުކުރައްވާފައެވެ.

3- ރައްޔިތުންގެ މަޖިލީހުގެ ގުރައިދޫ ދާއިރާ،

ގުރައިދޫ ދާއިރާގެ ގޮނޑި ފުރުއްވަމުން ގެންދެވި، މުޙައްމަދު ޣައްސާން މައުމޫން ރައީސުލްޖުމްހޫރިއްޔާ މިއަދު ވަނީ، މިނިސްޓަރ އޮފް ޑިފެންސްގެ މަގާމަށް ޢައްޔަނުކުރައްވާފައެވެ.

4- ރައްޔިތުންގެ މަޖިލީހުގެ މަޑުއްވަރީ ދާއިރާ،

މަޑުއްވަރީ ދާއިރާގެ ގޮނޑި ފުރުއްވަމުން ގެންދެވި، އަޙްމަދު ޝަރީފް ރައީސުލްޖުމްހޫރިއްޔާ މިއަދު ވަނީ، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސްގެ މަގާމަށް ޢައްޔަނުކުރައްވާފައެވެ.

5- ރައްޔިތުންގެ މަޖިލީހުގެ ނައިފަރުދާއިރާ،

ނައިފަރު ދާއިރާގެ ގޮނޑި ފުރުއްވަމުން ގެންދެވި، އަޙްމަދު ޝިޔާމް ރައީސުލްޖުމްހޫރިއްޔާ މިއަދު ވަނީ، މިނިސްޓަރ އޮފް ފިޝަރީޒް އެންޑް އޯޝަން ރިސޯސަސްގެ މަގާމަށް ޢައްޔަނުކުރައްވާފައެވެ.

19 ވަނަ ރައްޔިތުންގެ މަޖިލީހުގެ ދައުރު ހަމަވާން ބާކީ އޮތީ، 6 މަހަށްވުރެ ކުރު މުއްދަތެކެވެ. އެހެންކަމުން ހުސްވި ގޮނޑިތަކަށް މެމްބަރުން އިންތިޚާބުކުރުމަށް ބައި-އިލެކްޝަނެއް ނުބާއްވާނެއެވެ.

މިމެމްބަރުން މަޖިލީހުން ވަކިވެވަޑައިގެންނެވުމާއިއެކު ދެން ރައްޔިތުންގެ މަޖިލީހުގައި ތިބޭނީ، 81 މެމްބަރުންނެވެ.