ރައީސުލްޖުމްހޫރިއްޔާ، ޑރ މުހައްމަދު މުޢިއްޒުގެ ސަރުކާރަށް، ރައްޔިތުންގެ މަޖިލީހުން ފުރިހަމައަށް އެއްބާރުލުން ދޭނެކަމުގައި، ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައީސުލްޖުމްހޫރިއްޔާ، ޑރ، މުޙައްމަދު މުޢިއްޒާއި އެމަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަޠީފް މަޤާމުގެ ހުވާކުރެއްވުމަށް މިއަދު ހަވީރު ބޭއްވި ރައްޔިތުންގެ މަޖިލީހުގެ ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.

ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވީ، މިއަދަކީ ދިވެހިރާއްޖޭގެ ޖުމްހޫރީ ޙަޔާތުގައި ތާރީޚީ، ދުވަހެއް ކަމަށާއި، އަދި މިއަދުގެ ޖަލްސާއަކީ ބަރުލަަމާނީ ޙަޔާތުގައިވެސް ތާރީޚީ ދުވަހެއް ކަމަށެވެ. މިރޮނގުން އަސްލަމްގެ ވާހަކަފުޅު ކުރިޔަށް ގެންދަވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، އެމަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަޠީފަށް މަރުޙަބާއާއި ތަޙްނިޔާ ދެންނެވިއެވެ.

އަސްލަމް ވިދާޅުވީ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވަން ހުރި ކަންކަން ނުވަތަ މަޖިލީހުގައި އެދޭ ކަންކަން، ވީ އެންމެ ރަނގަޅަކަށް ކުރިޔަށް ގެންގޮސް ދެއްވާނެ ކަމުގެ ޔަޤީންކަން އަރުވާކަމަށެވެ. އަދި ރައްޔިތުންގެ ލާބައާއި މަންފާއަށް ކުރެވޭ ހުރިހާ ކަމެއްގައިވެސް ރައްޔިތުންގެ މަޖިލީހުގެ ފުރިހަމަ އެއްބާރުލުން އައު ސަރުކާރަށް ލިބޭނެ ކަމުގައިވެސް މަޖިލީހުގެ ރައީސް މުޙައްމަދު އަސްލަމް ވިދާޅުވިއެވެ. އަދި ދިވެހި ލޮބުވެތި ރައްޔިތުންގެ އުއްމީދަކީ، އަދި އެދުމަކީވެސް، ރައްޔިތުންނާއި މުޅި ޤައުމުގެ ލާބަޔާއި މަންފާއަށްޓަކައި ދައުލަތުގެ ބާރުތަކުން މަސައްކަތް ކުރުން ކަމުގައިވެސް އަސްލަމް ވަނީ ވިދާޅުވެފައެވެ.