އަރިއަތޮޅު ދެކުނުބުރި މަހިބަދޫ ކައިރީގައި އޮތް މާފަރުފަޅު ހިއްކާ، މީހުން ދިރިއުޅޭ ތަނެއްގެ ގޮތުގައި އެތަން ތަރައްޤީކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަނޑައަޅުއްވައިފިއެވެ.

ރައީސް ޞާލިޙު މިގޮތަށް ކަނޑައެޅުއްވީ މަހިބަދޫ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށްޓަކާއެވެ.

އދ. މަހިބަދުއަކީ އެ އަތޮޅުގައި އޮންނަ އެންމެ އާބާދީ ބޮޑު އެއްރަށެވެ. ރަށުގެ އާބާދީ 2000 އިން މައްޗަށް އަރާއިރު، ރަށުގެ ބޮޑުމިނަކީ 22.3 ހެކްޓަރެވެ.

ޢުމްރާނީ ތަރައްޤީގެގޮތުން ބަލާއިރު މިއީ މި އަތޮޅުގައި އެންމެ ފާހަގަކޮށްލެވޭ އެއް ރަށެވެ. ރަށުގެ ބިން މިހާރު ވަނީ އެއްކޮށް ފުރިފައެވެ. ދިރުއުޅުމަށް ގޯތި ދޫކުރާނެ ބިމެއް އަދި ސިނާޢީ މަސައްކަތްތަކާއި އެނޫންވެސް އިޤްތިޞާދީ އެކިއެކި މަސައްކަތްތަކަށް ދޫކުރާނެ ބިމެއްވެސް ރަށަކު ނެތެވެ. އެހެންކަމުން މާފަރުފަޅު ހިއްކާ، މީހުން ދިރިއުޅޭ ތަނެއްގެ ގޮތުގައި އެތަން ތަރައްޤީކުރުމަކީ ރަށުގެ ރައްޔިތުންނަށް ލިބިގެންދާނެ ބޮޑު އުފަލަކަށްވާނެއެވެ.