މިހާރު އިންޑިއާގައި ކުރިޔަށްދާ އައިސީސީ މެންސް ކްރިކެޓް ވޯލްޑް ކަޕްގެ ސެމީފައިނަލްގެ ފުރަތަމަ މެޗުގައި އިންޑިއާ އާއި ނިއުޒީލެންޑް ބައްދަލުކުރި މެޗު 70 ލަނޑުން ކާމިޔާބުކޮށް، ވޯލްޑް ކަޕް ފައިނަލްގެ ފުރަތަމަ ޖާގަ އިންޑިއާއިން ކަށަވަރުކޮށްފިއެވެ. މިއީ 2011 ވަނަ އަހަރަށްފަހު އިންޑިއާއިން ވޯލްޑް ކަޕް ފައިނަލް ކުޅޭ ފުރަތަމަ ފަހަރެވެ. އެ އަހަރު އިންޑިއާއިން ވޯލްޑް ކަޕް ކާމިޔާބުކުރީ ފައިނަލްގައި ސްރީލަންކާއާއި ދެކޮޅަށް ކުޅެ، މިރޭގެ މެޗު ކުޅުނު މުމްބާއީގެ ވަންކެޑެ ސްޓޭޑިއަމްގައި ސްރީލަންކާ ބަލިކޮށްގެންނެވެ.

މެޗުގެ ފުރަތަމަ އިނިންގްސްގައި ކުޅެން ނިކުތީ އިންޑިއާއިންނެވެ. އިންޑިއާއިން 4 މީހުން ނުބައިވެގެން 397 ލަނޑު ހެދިއެވެ. މިއީ ވޯލްޑް ކަޕް ސެމީ ފައިނަލް މެޗެއްގައި އެންމެ ގިނައިން ލަނޑު ހެދުނު އަދަދެވެ.

އިންޑިއާ ޓީމުން ސެމީ ފައިނަލް މެޗުގައި އެންމެ މޮޅު ކުޅުމެއް ދެއްކީ ވިރާތް ކޯލީ، މުޙައްމަދު ޝާމީ އަދި ޝްރެޔަސް އިޔާ އެވެ. މި މެޗުގައި ވިރާތް ކޯލީ ހެދި ސެންޗަރީއާއެކު އޭނާ މިވަނީ "ވަން ޑޭ އިންޓަނޭޝަނަލް" (އޯޑީއައި) ގައި ޖުމްލަ 50 ސެންޗަރީ ހަމަކޮށް، އެންމެ ގިނަ ސެންޗަރީ ހަދާފައިވާ ކުޅުންތެރިޔާގެ މަގާމު ހޯދާފައެވެ. ކޯލީގެ އިތުރުން ޝްރެޔަސް އިޔާ ވެސް ވަނީ އެންމެ 67 ބޯޅައިން ސެންޗަރީއެއް ހަމަކޮށްފައެވެ.

Advertisement

އިންޑިއާގެ ކުޅަދާނަ ބޯލަރު، ޝާމީ ވަނީ 57 ބޯޅައަށް 7 ވިކެޓު ނަގާފައެވެ. އަދި 6 މެޗުން ނެގި 24 ވިކެޓާއެކު މި މުބާރާތުގައި އެންމެ ގިނަ ވިކެޓު ނެގި ކުޅުންތެރިޔާއަކީ އޭނާއެވެ.

ކްރިކްޓް ވޯލްޑް ކަޕް އިންޑިއާ އިން ދެ ފަހަރު ކާމިޔާބުކޮށްފައިވެއެވެ. އެންމެ ފަހުން ކާމިޔާބުކުރީ 2011 ވަނަ އަހަރު، އިންޑިއާ އަދި ސްރީލަންކާގައި ބޭއްވި މުބާރާތުގައެވެ.