އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 14 ހަފްތާގައި އެންމެ މުހިންމު އިސްކަމެއް ދެއްވައިގެން ކުރައްވާނެ ކަންކަން ހިމެނޭ "ހަފްތާ 14 މަގުޗާޓް" ލޯންޗްކޮށްފިއެވެ. މި މަގުޗާޓު ލޯންޗްކޮށްދެއްވީ ދަރުބާރުގޭގައި ބޭއްވި ޙާއްސަ ހަފްލާއެއްގައި ޑރ. މުހައްމަދު މުއިއްޒުއެވެ.

ހަފްތާ 14 މަގުޗާޓުގައި 8 ދާއިރާއަކުން 161 ވައުދެއް ވަނީ ހިމަނާފައެވެ. މި ދާއިރާތަކުގެ ތެރޭގައި ހިމެނެނީ:

- މިނިވަންކަމާއި ސިޔާދަތު

- އިސްލާމްދީނާއި ޤައުމިއްޔަތު

- ގެދޮރުވެރިކަމާއި އުމްރާނީ ތަރައްޤީ

- އިޤްތިޞާދާއި ތިމާވެށި

- އަންހެނުން، ޒުވާނުން، ފަންނިއްޔަތު އަދި ކުޅިވަރު

- ޞިއްޙީ ދުޅަހެޔޮކަމާއި އޯގާތެރި މުޖްތަމަޢު

- ތައުލީމާއި ތަމްރީން

- ސަރުކާރުގެ ސިޔާސަތާއި ޤާނޫނީ އިޞްލާޙް

މި ޙަފްލާގައި ވާހަކަފުޅުދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، މި މަގުޗާޓަކީ ފުރަތަމަ 14 ހަފްތާގައި ކުރައްވާނެ ކަންކަން ކަމަށެވެ. ނަމަވެސް މިއީ ހަމައެކަނި ކުރައްވާނެ ކަންކަން ނޫންކަމަށެވެ. ބަޖެޓާއި ޢާމްދަނީ ހޯދޭ ގޮތާއި އެކީގައި 14 ހަފްތާގެ ޕްލޭންގައި ހިމެނޭ ކަންކަމުގެ އިތުރަށްވެސް ކަންކަން ކުރެވިގެންދާނެކަމަށް އިންތިޚާބީ ރައީސް ވަނީ ވިދާޅުވެފައެވެ. ވައުދުތައް ފުއްދެވުމުގެ މަސައްކަތް ފުރަތަމަ ދުވަހުން ފެށިގެން ފަށްޓަވާނެކަމުގެ ޔަޤީންކަންވެސް ޑރ. މުޢިއްޒު ވަނީ ދެއްވާފައެވެ. އަދި ރެއާއި ދުވާލު ކުރައްވާނެ މަސައްކަތަކީ ނަތީޖާ ނެރެދިނުންކަމަށާއި، އެކަންކަން ރައްޔިތުންގެ ލޯމަތިން ފެނިގެންދާނެކަމަށް އިންތިޚާބީ ރައީސް ވިދާޅުވިއެވެ.

މި ހަފްލާގައި ވަނީ އިންތިހާބީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކެންޕެއިންގައި ދެއްކެވި ވާހަކަފުޅުތައް ހިމެނޭ ފޮތެއް ނެރެދެއްވާފައެވެ. މި ފޮތް ނެރެދެއްވާފައިވަނީ ޑިރެކްޓަރ ޖެނެރަލް އޮފް ޓްރާންސިޝަން އަބްދުރަހީމް އަބްދުﷲ އެވެ.