ނޮވެމްބަރ 12 ވަނަ ދުވަހު އެޅުވި 'ޓައިގަރ 3' އަށް ދެދުވަސް ތެރޭގައި 100 ކްރޯރ އަށް ވުރެ ގިނަ އިންޑިއަން ރުޕީސް ލިބިއްޖެއެވެ. 100 ކްރޯރ އަކީ ގާތްގަނޑަކަށް 12 މިލިއަން ޑޮލަރެވެ. އިންޑިއާގައި 100 ކްރޯރ ހޯދާ ފިލްމުތަަކަށް ހާއްސަ ސަމާލުކަމެއް ލިބޭއިރު ޝާހްރުކް ޚާންގެ 'ޕަޓާން' އަދި 'ޖަވާން' އިން ވަނީ މިއަހަރު 500 ކްރޯރ އަށްވުރެ ގިނަ ފައިސާ ހޯދާފައެވެ. އަދި ސަނީ ޑިއޯލްގެ 'ގަދަރު 2' އަކީ ވެސް 500 ކްރޯރ ކްލަބްގެ ފިލްމެކެވެ.

ދިވާލީ އަށް ހާއްސަކޮށް އެޅުވި 'ޓައިގަރ 3' ގެ ފުރަތަމަ ދުވަހުގެ ކަލެކްޝަން މަދުވާނެކަމަށް ޓްރޭޑް އެކްސްޕާޓުން ބުނަމުން ދިއައީ އެދުވަހަކީ ގޭގޭގައި އާއިލާގެ މީހުންނާއެކު ދިވާލީ ފާހަގަކުރާ ދުވަހަށް ވީމައެވެ. ނަމަވެސް 43 ކްރޯރގެ އޮޕެނިންގ އަކާއެކު 'ޓައިގަރ 3' ވެގެން ގޮސްފައިވަނީ ސަލްމާން ޚާންގެ ކެރިއަރގެ ވެސް މިހާތަނަށް އެންމެ ގިނަ ފައިސާ ފުރަތަމަ ދުވަހުން ލިބުނު ފިލްމަށެވެ. ސަލްމާން ހާން މީގެ ކުރިން ދިއައީ އެތައް ފްލޮޕް ފިލްމުތަކެއް ދެމުންނެވެ. ނަމަވެސް 'ޓައިގަރ 3' އާއެކު އޭނަ ދެމުން އައި ފްލޮޕް ފިލްމުތައް މިވަނީ ނިމުމަކަށް އައިސްފައެވެ.

'ޓައިގަރ 3' ގެނެސްދީފައިވަނީ މިހާރު ޔަޝްރާޖް ފިލްމްސް އިން އުފައްދާފައިވާ 'ސްޕައި ޔުނިވާސް' ގެ ދަށުންނެވެ. މި ބެނަރގެ ދަށުން ޝާހްރުކް ޚާންގެ 'ޕަޓާން' އަދި ރިތިކް ރޯޝަންގެ 'ވަރ' ވެސް ހިމެނެއެވެ. އަދި ދެން މި ފިލްމުތަކުގެ ކޮންމެ އިންސްޓޯލްމެންޓެއްގައި ވެސް އެހެން ފިލްމުތަކުގެ ތަރިންގެ ހާއްސަ ފެނިލުންތައް ހިމެނޭނެއެވެ. 'ޓަރިގަރ 3' ގައި ޝާހްރުކް ޚާންގެ ފެނިލުމަށް ވެސް ބޮޑު ތަރުހީބެއް ދަނީ ލިބެމުންނެވެ.

'ޓައިގަރ' ގެ މިފަހަރުގެ ފިލްމުގައި ވެސް ކުރީގެ ދެ ފިލްމާއި ގުޅޭގޮތަށް ވާހަކަ ވަނީ އަތުރާލާފައެވެ. އަދި ފިލްމުގެ ގިނަކަންތައްތަކެއް ރަނގަޅެވެ. ސަލްމާންގެ އެކްޓިންގ އިން ފެށިގެން ކަޓްރީނާގެ އެކްޝަން ސީންތައް ވެސް މޮޅެވެ. އަދި ނެގެޓިވް ރޯލަކުން ފެނިގެން ދިއަ އިމްރާން ހާޝްމީ ވެސް ވަނީ މި ފިލްމުގައި މޮޅު އެކްޓިންގ އެއް ދައްކުވައިދީފައެވެ. ފިލްމު މިހާރު ސިނަމާގައި ދައްކަމުން ދާއިރު މާލޭގެ ޝްވެކް ސިނަމާއިން ވެސް މިހާރު ދަނީ މި ފިލްމު ދައްކަމުންނެވެ.