ދިވެހި ޕްރިމިއަ ލީގުގެ ކުޅުން ގިނަ ދުވަސްތަކަކަށް މެދުކަނޑާލާފައި އޮތުމަށްފަހު، މި އަންނަ ބުރާސްފަތި ދުވަހު އަލުން ފަށުމަން ފުޓްބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ނިންމައިފިއެވެ.

އެންމެ ފަހުން މި ސީޒަނުގެ ލީގު މެޗެއް ކުޅެފައިވަނީ އޯގަސްޓް 29 ވަނަ ދުވަހުއެވެ. އޭގެ ފަހުން މިހާރު ދެ މަސް ފާއިތުވެއްޖެއެވެ. އޭރު ލީގު މެދުކަނޑާލީ އޭއެފްސީ ކަޕްގައި މާޒިޔާ ކުޅޭ މެޗުތަކަށާއި، ވޯލްޑް ކަޕް/އޭޝިއަން ކަޕްގެ ކޮލިފައިންގައި ބަންގްލަދޭޝްއާ ދެކޮޅަށް ރާއްޖޭގެ ގައުމީ ޓީމު ކުޅޭ ދެ މެޗަށެވެ.

ކުރިން ލީގު ފެށުމަށް ނިންމާފައި އޮތީ މިދިޔަ އޮކްޓޯބަރ މަހުގެ 28 ވަނަ ދުވަހު ނަމަވެސް، ޕްރޮސެކިއުޓާ ޖެނެރަލްގެ އެންގެމަށް މޯލްޑިވްސް ޕޮލިސް ސަރވިސަސްއިން އެފްއޭއެމްއަށް ތުހުމަތު ކުރެވޭ މައްސަލައެއް ތަހުގީގު ކުރަން ފެށުމުން، ލީގު ފެށުން ލަސްކޮށްފައިވާކަމަށް އޭރު އެފްއޭއެމްއިން އެންގިއެވެ.

Advertisement

ލީގު އަލަން ފަށާއިރު ބުރާސްފަތި ދުވަހުގެ ހަވީރު ބައްދަލު ކުރާނީ ކްލަބް އީގަލްސް އާއި ޔުނައިޓެޑް ވިކްޓްރީއެވެ. އަދި ބުރާސްފަތި ދުވަހުގެ ރޭ ކުޅޭ މެޗުގައި ބައްދަލުކުރާނީ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި، ކްލަބް ވެލެންސިއާއެވެ.

ލީގުގެ އެއްވަނައިގައި މިހާރު އޮތީ 23 ޕްއިންޓާއެކު ކްލަބް އީގަލްސްއެވެ. އެއީ ޖުމްލަ 9 މެޗު ކުޅެގެނެވެ. އަދި ދެވަނައިގައި އޮތީ މާޒިޔާއެވެ. ޖުމްލަ 8 މެޗު ކުޅެގެން މާޒިޔާއަށް ލިބިފައި އޮތީ 22 ޕޮއިންޓެވެ.