މިސަރުކާރު އައިރު، ބައިނަލްއަޤުވާމީ މައިދާނުގައި ރާއްޖެ އޮތީ ވަރަށް ބޮޑަށް އެކަހެރިވެފައި ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޚާރިޖީ ޚިދުމަތުގެ އެންމެ މަތިވެރި ޝަރަފް އެރުވުމުގެ ގޮތުން މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި، ވިދާޅުވީ، މިސަރުކާރު އައިއިރު، ބައިނަލްއަޤުވާމީ މައިދާނުގައި ރާއްޖެ އޮތީ ވަރަށް ބޮޑަށް އެކަހެރިވެފައި ކަމަށާއި، ބައިނަލްއަޤުވާމީ ޖަމާޢަތްތަކާ ދެމެދު އޮންނަ ގުޅުން އޮތީ ވަރަށް ބޮޑަށް ހީނަރުވެފައި ކަމަށެވެ. އަދި ބައެއް އިސްލާމީ ޤައުމުތަކާއި ރާއްޖެއާ ދެމެދު ގުޅުން ކެނޑިފައި އޭރު އޮތުމަކީ، ދިވެހިންނަށް ލިބުނު ވަރަށް ބޮޑު ދެރައެއް އަދި ނިކަމެތިކަމެއްކަން އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ޢަބުދުﷲ ޔާމީން ޢަބުދުލް ޤައްޔޫމުގެ ވެރިކަމުގައި ރާއްޖެއިން އިރާނާއި، އަދި ޤަތަރާއި އެކު އޮތް ސިޔާސީ ގުޅުން ކަނޑާލިއެވެ. އަދި ކޮމަންވެލްތްއިން ރާއްޖެ ވަކިވިއެވެ. މިގެ އިތުރުން ރައީސް ޔާމީންގެ ވެރިކަމުގައި އިންޑިއާ އާއި ދިވެހިރާއްޖޭގެ ގުޅުން ވަރަށް ބޮޑަށް ގޯސްވެގެން ދިޔައެވެ. 

އެކަންކަމަށް އިޝާރާތްކުރައްވައި، ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ،  ބައިނަލްއަޤުވާމީ މުޖުތަމަޢުގައި ދިވެހިރާއްޖެއަށް އިތުބާރާއި ޔަޤީންކަން އަލުން އަނބުރާ ހޯދުމަށް ދިވެހި ސަރުކާރުން ވަރަށް ގިނަ މަސައްކަތްތަކެއް ކުރަންޖެހުނު ކަމަށެވެ. 

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ނިމިގެން މިދާ 5 އަހަރުގެ ދައުރުގެ ތެރޭގައި ވަނީ، ރައީސް ޔާމީނުގެ ސަރުކާރުގައި ގުޅުން ކަނޑާލި ޢަރަބި އިލްސާމީ ޤައުމުތަކާއި އަލުން ސިޔާސީ ގުޅުންތައް ޤާއިމްކޮށް، ކޮމަންވެލްސްތުގައިވެސް އަލުން ބައިވެރިވެފައެވެ. މީގެ އިތުރުން، އދ.ގެ އާއްމު މަޖިލީހުގެ ރިޔާސަތަށް ރާއްޖޭގެ ފޮރިން މިނިސްޓަރ ޢަބުދުﷲ ޝާހިދު އިންތިޚާބު ވުމަކީވެސް ޚާރިޖީ ދާއިރާއިން ރާއްޖެއަށް ލިބިގެންދިޔަ މުހިއްމު ކާމިޔާބީއެކެވެ.