އާދީއްތަ ދުވަހުގެރޭ ޗެލްސީގެ ސްޓެމްފަރޑް ބްރިޖުގައި ޗެލްސީއާއި މެންޗެސްޓަރ ސިޓީ ބައްދަލުކުރިމެޗު 4-4 ން އެއްވަރުވެ، ލީގުގެ އެއްވަނައިގައި ސިޓީއަށް އޮތް ލީޑު ހަނިވެއްޖެއެވެ. މެޗުގެ 86 ވަނަ މިނެޓުގައި ސިޓީއިން ލީޑު ނަގާފައިވަނިކޮށް، އިތުރު މިނެޓުގައި ޗެލްސީއަށް އެއްވަރުކޮށްދިނީ، މެޗުގެ 90 ވަނަ މިނެޓުގައި ކުޅެން ނިކުތް އަރްމާންޑޯ ބްރޯހާއަށް ރޫބެން ޑިއާޒްކުރި ފައުލަކަށް ލިބުނު ޕެނަލްޓީއަކުން ކޯލް ޕާމާއެވެ.

ޖުމްލަ 8 ގޯލު ފެނިގެން ދިޔަ މި މެޗުގެ ފުރަތަމަ ހާފް ނިމުނީ 2-2 ން އެއްވަރުވެގެނެވެ. ސިޓީއަށް ލިބުނު ޕެނަލްޓީއަކުން އާރލިންގ ހާލަންޑް އެ ޓީމަށް ލީޑު ނަގާދީފައިވަނިކޮށް، ތިއާގޯ ސިލްވާ އަދި ރަހީމް ސްޓާލިންގެ ގޯލުތަކުން ޗެލްސީއިން މެޗުގެ ލީޑު ނެގިއެވެ. ނަމަވެސް ހާފު ނިމުމުގެ ކުރިން ސިޓީއަށް ލިބުނު ކޯނަރެއްގެ ބޭނުންހިފައި، ސިޓީގެ ޑިފެންޑަރު މެނުއަލް އަކަންޖީ މެޗު ހަމަހަމަކުރިއެވެ.

ދެވަނަ ހާފު ފަށާ މާ ގިނައިރުތަކެއް ނުވެ، ހާލަންޑު އަނެއްކާވެސް ސިޓީއަށް ލީޑު ނަގާދިނެވެ. އޭގެ ފަހުން ޗެލްސީގެ ނިކޮލަސް ޖެކްސަން ޗެލްސީއަށް މެޗުގެ ނަތީޖާ ހަމަހަމަކޮށްދިންތަނާ، މެޗުގެ 86 ވަނަ މިނެޓުގައި ރޮޑްރީގެ ގޯލަކުން ސިޓީ ތިންވަނަ ފަހަރަށް ލީޑު ނެގިއެވެ. އަދި އެއަށްފަހު ޗެލްސީއިން ތިން ވަނަފަހަރަށް މެޗުގެ ނަތީޖާ ހަމަހަމަކުރީ، އެ ޓީމަށް ލިބުނު ޕެނަލްޓީ ކާމިޔާބުކޮށް ޕާމާއެވެ.

ލިވަޕޫލުން ލީގުގެ ދެވަނައަށް ކުރިޔަށް ޖެހެލީ، އާދީއްތަ ދުވަހު 3-0 ގެ ނަތީޖާއަކުން ބްރެންޓްފޯޑު ބަލިކޮށް، 27 ޕޮއިންޓު ހޯދައިގެންނެވެ. މި މެޗުގައި ލިވަޕޫލްގެ މުޙައްމަދު ޞަލާހް ކާމިޔާބުކުރި 2 ގޯލާއިއެކު، އޭނާ މިވަނީ މިހާތަނަށް ޕްރިމިއާ ލީގުގައި 200 ގޯލު ހަމަކޮށްފައެވެ. އަދި، އެއް ސީޒަނެއްގައި، އަމިއްލަ ދަނޑުގައި، ޖެހިޖެހިގެން ފުރަތަމަ ހަ މެޗުން ގޯލު ކާމިޔާބުކުރި ހަމައެކަނި ލިޕޫލްގެ ކުޅުންތެރިޔާގެ ރެކޯޑުވެސް މި ވަނީ އޭނާ ހޯދާފައެވެ.

ލީގުގެ ތިން ވަނައިގައި އޮތް އާސެނަލްއަށް ވެސް ލިބިފައިވަނީ 27 ޕޮއިންޓެވެ.