މިއީ ހަމާސް އާއި އިސްރާއީލު ސިފައިންނާ ދެމެދު ކުރިޔަށްދާ ހަނގުރާމައިގެ 37 ވަނަ ދުވަސް، 12 ނޮވެމްބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ޣައްޒާގައި ހުންނަ ދެވަނައަށް އެންމެ ބޮޑު ހޮސްޕިޓަލް ކަމުގައިވާ، އަލް-ޤުދުސް ހޮސްޕިޓަލްގެ އޮޕަރޭޝަންތައް މަޖުބޫރު ހާލަތުގައި ހުއްޓާލާފައިވާކަމަށް ފަލަސްތީނުގެ ރެޑް ކްރެސެންޓް ޖަމްއިއްޔާއިން ބުނެފި. ހޮސްޕިޓލްތައް ހުއްޓާލުމަށް މަޖުބޫރުވީ އިސްރާއީލުން ދެމުންގެންދާ ހަމަލާތަކާ ގުޅިގެން ހޮސްޕިޓަލްގެ އޮޕަރޭޝަންތައް ކުރިޔަށް ގެންދެވޭނެ ހަކަތަ ނެތިގެންކަމަށް އެ ޖަމްއިއްޔާއިން ބުނޭ.

🔴 އަލް-ޝިފާ ހޮސްޕިޓަލުގެ އޮޕަރޭޝަންތައް ކުރިޔަށް ގެންދިއުމަށް 300 ލީޓަރުގެ ތެޔޮ ދިނުމުން ހަމާސްއިން އެކަމަށް ދެކޮޅު ހެދިކަމަށް އިސްރާއިލުން ބުނާ ބުނުން ހަމާސް އިން ދޮގުކޮށްފި.

🔴 ޣައްޒާގެ ހޮސްޕިޓަލުތައް ހުއްޓުމަކަށް އައުމުގެ ސަބަބުން ފަރުވާ ނުދެވި ތިބި ބަލި މީހުނަށް ފަރުވާދެވޭނެ އެހެން ގޮތެއް ހޯދުމަށް، ހަނގުރާމަ މެދުކަނޑާލަން ޖެހޭކަމަށް ޔޫރަޕިއަން ޔޫނިއަންގެ ފޮރިން ޕޮލިސީ ޗީފް ގޮވާލައިފި.

🔴 އިސްރާއީލް އަސްކަރިއްޔާގެ ސްނައިޕަރުން ދަނީ ކަރަންޓާ، ފެނާ، ކާބޯތަކެތި ނެތިފައި ތިބި އެތައްބަޔަކު ހިޔާވަހިކަން ހޯދައިގެން ތިބި އަލް-ޝިފާ ހޮސްޕިޓަލްގެ ކައިރިން ގިނަ އާންމުންގެ ގަޔަށް ބަޑި ޖަހަމުން. މިކަމާ ގުޅިގެން ހޮސްޕިޓަލުން ނުނިކުމެވި އެތައް ސަތޭކަ ބަޔަކު ތިބީ ތާށިވެފައި.

🔴 އަލް-ޝިފާ ހޮސްޕިޓަލާ މުވާސަލާތީ ގުޅުން އަނބުރާ ގާއިމްވިޔަސް، އެ ހޮސްޕިޓަލަކީ މިހާރު ހޮސްޕިޓަލެއްހެން އޮޕަރޭޓްކުރާ ތަނެއް ނޫންކަމަށް ވޯލްޑް ހެލްތް އޯގަނައިޒޭޝަންއިން ހާމަކޮށްފި. އެ ތަންތަނުގެ ހިސްހީ ހިދުމަތްތައް ހުއްޓާލަން ޖެހިފައިވުމުން، މިހާރު އެތަންތަން ބޭނުން ކުރަނީ ރެފިއުޖީ ކޭޕްމްތަކެއް ގޮތަށް.

🔴 ވޯލްޑް ހެލްތް އޯގަނައިޒޭޝަންއިން އިތުރަށް ހާމަކުރާ ގޮތުގައި ހޮސްޕިޓަލްތަކަމަށް ހަމަލާ ދިނުމުގެ ނަތީޖާއެއްގެ ގޮތުން، ފަރުވާ ނުލިބިފައި ތިބި އެތައް ބަޔަކު އަންނަނީ މަރުވަމުން. މީގެ ތެރޭގައި ދުވަސް ނުފުރާ އަލަށް ވިހާފައި ތިބި ތުއްތު ކުދިން ވެސް ހިމެނޭ.

🔴 އިސްރާއީލުން ދެމުންގެންދާ ހަމަލާތަކުގައި މިހާތަނަށް ފަލަސްތީނުގެ 11،100 މީހަކު މަރުވެފައިވޭ. މީގެ ތެރޭގައި ގިނަ އަދަދެއްގެ ކުޑަކުދިންނާއި އަންހެނުން ހިމެނޭ.