ހައްދު ފަހަނައެޅި އިޒްރޭލުގެ ސަޙްޔޫނީ ދައުލަތުން، ފަލަސްޠީނުގެ ޣައްޒާއަށް ދެމުންގެންދާ ހަމަލާތަކާއި އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، ގާޒާގެ އެންމެ ބޮޑު ހޮސްޕިޓަލް އަލް-ޝިފާ ހޮސްޕިޓަލްގެ ނިއޯނޭޓަލް އައިސީޔޫގައި ބައިތިއްބާފައި ތިބި 44 ކުޑަކުދިން މަރުވެއްޖެއެވެ.

މަރުވި ކުދިންނަކީ، ދުވަސް ނުފުރާ ވިހެއުމުންނާއި ވިހެމުއުގެ ތެރޭގައި ދިމާވާ މައްސަލަތަކުގެ ސަބަބުން އައިސީޔޫގައި ފަރުވާދެމުން ދިޔަ ކުދިންނެވެ. އެކުދިން މަރުވެފައިވަނީ، ހޮސްޕިޓަލަށް ބޭނުންވާ އަސާސި ތަކެތި ނުލިބުމާއި އޮކްސިޖަން ހުސްވުމުގެ ސަބަބުންނެވެ.

ގާޒާއަށް އަރާފައިވާ އިޒްރޭލުގެ ސަޙްޔޫނީ ސިފައިން ދަނީ، ގާޒާގެ ހޮސްޕިޓަލްތަކަށް ހަމަލާދެމުންނެވެ. އަލްޝިފާ ހޮސްޕިޓަލުގެ އޮޕަރޭޝަން ތިއޭޓަރުތައް ހުންނަ އިމާރާތަށްވެސް އިޒްރޭލު ސިފައިން ވަނީ ހަމަލާދީފައެވެ.

ގާޒާގެ އަލްގުދުސް ހޮސްޕިޓަލާއި 20 މީޓަރު ގާތަށް އިޒްރޭލު ސިފައިން ވަނީ އައިސްފައި ކަމަށްވެސް ޚަބަރުތައް ބުނެއެވެ.

އިޒްރޭލުން ޣައްޒާއަށް ބޮން އަޅަމުން އަންނަތާ 35 ދުވަސް ވެފައި ވާއިރު، ގާޒާއިން 11038 މީހުން ވަނީ މަރުވެފައެވެ. އޭގެ ތެރޭގައި 5000 ވުރެ ގިނަ ކުޑަކުދިން ހިމެނެއެވެ.