އިންޑިއާ ސިފައިންގެ މައްސަލައަކީ މަގުމަތިން ހައްލު ކުރެވޭނެ މައްސަަލައެއް ނޫންކަމުގައި އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދިވެހިރާއްޖޭގެ ޖުމްހޫރީ ދުވަހާއި ގުޅުވައިގެން ޕީއެސްއެމްއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ.

އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވީ، އިންޑިއާ ސިފައިންގެ މައްސަލައަކީ އިންޑިއާއާ ވާހަކަ ނުދައްކައި ހައްލު ކުރެވޭނެ މައްސަލައެއް ނޫންކަމަށެވެ. އަދި އެމަނިކުފާނު ބޭނުންފުޅުވަނީ، ވީހާ ވެސް ބޮޑަކަށް އިންޑިއާއާ ގާތުން ވާހަކަ ދައްކައިގެން މި މައްސަލަ ހައްލު ކުރަންކަމަށާއި އެއީ މަގުމަތިން ހާސިލުކުރެވޭނެ ކަމެއް ނޫން ކަމުގައިވެސް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވިއެވެ. އެހެންވެ، ރައްޔިތުން މިހާރު ވަނީ ސަރުކާރުގެ ނިޒާމުގެ ތެރެއިން މިކަން ކުރަން ނިންމާފައި ކަމުގައިވެސް އެމަނިކުފާނު ވިދާޅުވިއެވެ.

އިންޑިއާ ސިފައިން ރާއްޖެއިން ބޭލުމަށް ގޮވާލާ ބޭއްވި މަގުމަތީ ހަރަކާތްތަކުގައިވެސް އިސްކޮށް އުޅުއްވި، އިންތިޚާބީ ރައީސް ޑރ މުޙައްމަދު މުޢިއްޒު ވަނީ އިންޑިއާއަށް ތައުރީފް ކުރައްވައި، މިޕްރޮގްރާމްގައި ވާހަކަފުޅު ދައްކަވާފައެވެ. މިގޮތުން އިންޑިއާއާ ދިވެހިރާއްޖެއަކީ ދުރު ނުވެވޭނެ ރަޙްމަތްތެރިކަން އޮތް ދެޤައުމުކަމާއި، އިންޑިއާއިން ރާއްޖެއަށް ގިނަ ގުނަ އެހީތައް ފޯރުކޮށްދީ، އަދި ކުރިޔަށް އޮތްތަނުގައިވެސް އިތުރު އެހީތައް ފޯރުކޮށްދޭނެ ކަމުގައިވެސް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވިއެވެ.

ރާއްޖެއިން އިންޑިއާ ސިފައިން ބޭލުމަކީ، އިންތިޚާބީ ރައީސް ޑރ މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އަދި ވެރިކަމަށް ވަޑައިގެން އެންމެ ފުރަތަމަ ކުރައްވާނެ ކަމަކީ އެއީ ކަމުގައިވެސް އެމަނިކުފާނު ވަޢުދުވެވަޑައިގެންފައިވެއެވެ. މީގެ އިތުރުން އިންތިޤާލީ މަރުޙަލާގެ ތެރޭގައި، ރާއްޖޭގައި ތިއްބަވާ އިންޑިއާ ސަރުކާރުގެ އިސް ޑިޕްލޮމެޓުންނާއި ބައްދަލު ކުރައްވައި އެކަމާއި ގުޅޭ ގޮތުން މަޝްވަރާތައް ކުރައްވާފައިވާ ކަމުގައިވެސް އިންތިޚާބީ ރައީސް ޑރ މުޙައްމަދު މުޢިއްޒު ވަނީ ވިދާޅުވެފައެވެ.