ރާއްޖެއިން ބޭރުގައި ހުރި ރާއްޖޭގެ ޑިޕްލޮމެޓިކް އަދި ކޮންސިއުލާ މިޝަންތަކުގައި ވަޒީފާއަދާކުރަމުންދާ ބައެއް މުވައްޒަފުން އެނބުރި ރާއްޖެ އައުމަށް ފޮރިން މިނިސްޓްރީން އަންގައިފިއެވެ. މިގޮތަށް އަންގަވާފައިވަނީ އިންތިޚާބީ ރައީސުލްޖުމްހޫރިއްޔާގެ އެދިލެއްވުމަށް ކަމަށް ފޮރިން މިނިސްޓްރީން ވިދާޅުވެއެވެ.

ރާއްޖޭން ބޭރުގެ ދިވެހި އެމްބަސީތަކުގައި ސިޔާސީ މަގާމުތައް އަދާކުރައްވާ ބޭފުޅުން ރާއްޖެ އައުމަށް އަންގާފައިވަނީ މި މަހުގެ 18ގެ ކުރިންނެވެ. 

މިނިސްޓްރީން ބުނި ގޮތުގައި ސިޔާސީ މަގާމުތަކުގައި ތިއްބެވި 61 ބޭފުޅަކަށް މިހާރު ވަނީ އެ ދުވަހުގެ ކުރިން ރާއްޖެ ވަޑައިގަތުމަށް ދަންނަވައިފައެވެ.

މަޢުލޫމާތު ލިބޭގޮތުގައި މީގެތެރޭގައި ގިނައިން ހިމެނެނީ މިޝަންތަކުގައި މަސައްކަތްކުރައްވާ ސިޔާސީ މުވައްޒަފުންނެވެ.

އަންނަ ހުކުރު ދުވަހު ރައީސްކަމާ ހަވާލުވެ ވަޑައިގަންނަވާ ޑރ. މުއިއްޒުގެ ސަރުކާރުގައި ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރާނެ ކަމަށް ވަނީ ބުނެފައެވެ.