ރާއްޖެއަށް އެތެރެކޮށް ވިއްކަމުންދާ، ކުޑަކުދިންނަށް ދޭ ޕެރަސެޓްމޯލްގެ ބްރޭންޑެއް ކަމުގައިވާ، ކެލްޕޮލް ޕީއެޑްޓްރިކް ޑްރޮޕްސް ރާއްޖޭގައި ވިއްކުމާއި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީން މަނާކޮށްފިއެވެ. 

އެ އޮތޯރިޓީން އާއްމުކޮށްފައިވާ އިއުލާނުގައި ބުނެފައި ވަނީ، ކެލްޕޮލް ޕީއެޑްޓްރިކް ޑްރޮޕްސް، ޕެރަސެޓްމޯލް ޕީއެޑްޓްރިކް އޯރަލް ސަސްޕެންސަން އައިޕީ 100މގ ގެ ފުޅީގައި، ކުލަ ބަދަލުވުމާއި ގަނޑުވެފައި ހުރުން ފާހަގަކުރެވިފައިވާ ކަމަށެވެ. އެހެންވެ އެމައްސަލަ ބަލަމުންދާތީ، އެބޭސް ރާއްޖެ އެތެރެކުރުމާއި ވިއްކުމާއި ބޭނުން ކުރުން މަނާކުރާ ކަމަށެވެ. 

އިންޑިއާގެ ކުންފުންޏަކުން އުފައްދާ މި ބޭހަކީ، ތަދުކެނޑުވުމަށާއި ހުމަށް ތުއްތުކުދިންނަށް ދޭ ބޭހެކެވެ. މިބޭހަކީ އިންޑިއާއިން އެމެރިކާއަށާއި ޔޫރަޕްގެ ޤައުމުތަކަށްވެސް އެކްސްޕޯޓްކުރާ ބޭހެކެވެ.