ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ، މަޖިލީހުގައި ކުރިޔަށް ގެންދެވޭނެ ގޮތެއް ހޯދުމަށް އެމްޑީޕީގެ ފަރާތުން ސްޕްރީމްކޯޓަށް ހުށައެޅި ދުސްތޫރީ މައްސަލައިގެ ޙުކްމް އިއްވުން މިއަދު ބާއްވާނެ ކަމުގައި އެކޯޓުން ބުނެފިއެވެ.

ސްޕްރީމްކޯޓުން ބުނީ އެމައްސަލައިގެ ޙުކުމް އިއްވާ ޝަރީއަތުގެ މަޖިލިސް މިއަދު ހަވީރު، 4:00ގައި ބޭއްވުމަށް ތާވަލުކޮށްފައިވާ ކަމަށެވެ.

އެމްޑީޕީގެ ފަރާތުން ހުށައެޅި މިމައްސަލައިގެ އަޑުއެހުންތައް ސްޕްރީމްކޯޓުގައި ފެށީ ހޯީމަދުވަހުއެވެ. އަދި އަންގާރަ ދުވަހު ވަނީ އަޑުއެހުންތައް ނިންމާލާފައެވެ.

އެމްޑީީޕީން ސްޕްރީމްކޯޓަށް މައްސަލަ ހުށައަޅާފައި ވަނީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލައިގައި، މަޖިލީހުގެ ނިޒާމްގެ ތެރެއިން ނާޖާއިޒް ނުފޫޒާއި ބާރު ބޭނުންކޮށްގެން އެމައްސަލަ ހުއްޓުވާފައިވާ ކަމަށް ތުހުމަތުކޮށް، އެމައްސަލަ ކުރިޔަށް ގެންދެވޭނެ ގޮތުގެ ހައްލެއް ހޯދުމަށެވެ. ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅައި، 14 ދުވަހުގެ މުއްދަތު ހަމަވެ، ޖަލްސާ އެޖެންޑާކުރުމުން، މަޖިލީހުގެ ނައިބުރައީސް އިވާ އަބުދުﷲ ވަނީ އަލާސްކަންފުޅާއި އުޅުއްވާކަމަށް ބުނެ ތަކުރާރުކޮށް ރައްޔިތުންގެ މަޖިލީހަށް ސަލާމް ފޮނުއްވަން ފައްޓަވާފައެވެ. މަޖިލީހުގެ ޤަވާއިދު ބުނާ ގޮތުން މަޖިލީހަށް މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށައެޅިފައި ވަނިކޮށް އެމައްސަލަ ކުރިއަށް ނުގެންގޮސް މަޖިލީހުގެ އިތުރު މަސައްކަތްތަކެއް ކުރިޔަކަށް ނުގެންދެވޭނެއެވެ. އެގޮތުން މަޖިލީހަށް އިތުރުކަމެއް ހުށައެޅޭނީ އަދި ބަހުސްކުރެވޭނީވެސް އިތުބާރު ނެތްކަމުގެ މައްސަލައިގައި ގޮތެއް ނިންމުމަށްފަހުގައެވެ.

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ މީގެ ކުރިންވެސް އެމްޑީޕީން ހުށައެޅިއެވެ. ރައީސް ނަޝީދު އެފަހަރު އިތުބާރު ނެތްކަމުގެ މައްސަލަ ކުރިޔަށް ނުގެންގޮސް ހިފެހެއްޓެވީ، މަޖިލީހުގެ ދާއިމީ ކޮމިޓީތައް އެކުލަވާލެއްވުން ލަސްކުރައްވައިގެންނެވެ. އަދި ރިޔާސީ އިންތިޚާބުގެ ފުރަތަމަ ބުރުގައި ސަރުކާރަށް ލިބުނު ނާކާމިޔާބީއަށްފަހު އިތުބާރު ނެތްކަމުގެ މައްސަލަ އެމްޑީޕީން އަނބުރާ ނެގިއެވެ.

ސްޕްރީމްކޯޓަށް ހުށައެޅި މައްސަލައިގައި، އެމްޑީޕީން މައިގަނޑުގޮތެއްގައި ބޭނުންވެފައި ވަނީ، އިތުބާރު ނެތްކަމުގެ މައްސަަލައިގެ ރިޔާސަތު ބެލެހެއްޓޭނެ ގޮތް ކަނޑައެޅުމުގައި، ޤާނޫނު އަސާސީއާ މަޖިލީހުގެ ޤަވާއިދު މާނަކުރާ ގޮތުގެ ހައްލެއް ހޯދުމަށެވެ.

ސްޕްރީމްކޯޓަށް އެމްޑީޕީން ހުށައެޅި މިމައްސަލައިގެ ތެރެއަށް ޕީޕީއެމް ޕީއެންސީ އާއި އަދި ދަ ޑިމޮކްރެޓްސްއިން ވަނީ ތަދައްޚުލްވެފައެވެ.