މިއީ ހަމާސް އާއި އިޒްރޭލު ސިފައިންނާ ދެމެދު ކުރިޔަށްދާ ހަނގުރާމައިގެ 33 ވަނަ ދުވަސް،08 ނޮވެމްބަރ 2023 ގައި ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴 ސީއައިއޭގެ ޑިރެކްޓަރު ބިލް ބާންސް މެދުއިރުމައްޗަށް މިހާރު ކުރަމުންދާ ދަތުރުގައި މިއަދު ގަތަރަށް ދަތުރު ކުރަން ނިންމާފައިވޭ. ރިޕޯޓްތައް ބުނާގޮތުން އޭނާ މަޝްވަރާ ކުރާނީ އަސީރުން ދޫކޮށްލަން އެއްބަސްވާނަމަ ވަގުތީގޮތުން ހަނގުރާމަ ހުއްޓާލުމާ ގުޅޭ ގޮތުން. 

🔴 އިސްރާއީލުގެ ޖަލުތަކުގައި ބަންދުކޮށްފައިތިބި ސިޔާސީ ކުށްވެރިން ދޫކޮށްލުމަށް ހަމާސްގެ ލީޑަރަކު ގޮވާލައިފި. އަދި މިކަމާ ގުޅިގެން ހަމާސްގެ ބެލުމުގެ ދަށުގައި ތިބި އަސީރުން ދޫކޮށްލުމަށް މަޝްވަރާ ކުރާން ތައްޔާރަށް ތިބިކަމަށް ހާމަކޮށްފައިވޭ. ނަމަވެސް އިސްރާއީލުގެ ޕްރައިމް މިނިސްޓަރ ނަތަން ޔާހޫ ބުނީ، ހަނގުރާމަ މެދުކަނޑާލުމަށް ވިސްނޭނީ އަމާސްއިން އަސީރުން ދޫކޮށްލުމުންކަމަށް.

🔴 އިސްރާއީލުން ދެމުންގެންދާ ބޮމުގެ ހަމަލާތަކާ ގުޅިގެން ފަލަސްތީނުގެ ގިނަ ބަޔަކު އެ ގައުމުގެ ދެކުނަށް ދިއުމަށް މިހާރު އަންނަނީ ދަތުރުކުރަމުން. 

🔴 ޣައްޒާއަށް ދެމުންގެންދާ ހަމަލާތަކުގައި މިހާރު މިހާތަނަށް އދ. ގެ 92 މުވައްޒަފަކު މަރުވެފައިވާކަމަށް އެ ޖަމްއިއްޔާއިން ހާމަކޮށްފި. މިއީ މިފަދަ ހަނގުރާމައެއްގައި މިހާތަނަށް އެންމެ ގިނައިން އދ. ގެ މުވައްޒަފުން މަރުވި ފަހަރު.

🔴 ޣައްޒާގެ ކުޑަ ކުދިންގެ މެދުގައި ބަނޑުހައިހޫނުކަމާއި ޑީހައިޑްރޭޝަން އަދި ގިނަ ބަލިތަކެއް ފެތުރެމުންދާކަމަށް "ސޭވް ދަ ޗިލްރެން" އިން އިންޒާރުދީފި.

🔴 މި ހަނގުރާމައިގައި ޣައްޒާއިން މިހާތަނަށް މަރުވެފައިވާ މީހުންގެ އަދަދު 10،500 އަށް އަރާކަމަށް ފަލަސްތީނުގެ ހެލްތް މިނިސްޓްރީއިން ހާމަކުރޭ.