ސިޓްރިޒަން ދިޔާ ބޭހެއް ބޭނުން ކުރުމާއި ވިއްކުން ރާއްޖޭގައި މަނާކޮށްފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން ހާމަކޮށްފައިވާ ގޮތުގައި ރާއްޖޭގައި ވިއްކުން މަނާކޮށްފައި ވަނީ، ޕާކިސްތާނުގައި އުފައްދާފައިވާ، އެލަރގޯ އޯރަލް ލިކުއިޑް ބޭހެވެ. މިއީ އެލާޖީއަށާއި ކެއްސުމާއި ހުމާއި ރޯގާއަށް ދޭ ބޭހެކެވެ. 

އެމްއެފްޑީއޭއިން ބުނެފައި ވަނީ މިބޭހުގައި، ކެމިކަލް މާއްދާއެއް ކަމުގައިވާ، ޑައިއީތައިލިން ގްލައިކޯލް އަދި އިތައިލިން ގްލައިކޯލް ހިމެނިފައިވާކަމަށް ދުނިޔޭގެ ސިއްހަތު ޖަމިއްޔާއިން ހާމަކޮށް އިންޒާރު ދީފައިވާ ކަމަށެވެ. އަދި މިބްރޭންޑުގެ ބޭހުގެ 10 ސާމްޕަލް ނަގައި ޓެސްޓްކުރި އިރު އެމާއްދާތައް އެބޭހުގައި އެކުލެވިގެންވާ ކަން ތަޙްލީލުތަކުން ދައްކާފައިވާ ކަމުގައިވެސް އެމްއެފްޑީއޭއިން ވަނީ ބުނެފައެވެ. އެހެންވެ އެބޭހުގެ ރައްކާތެރިކަން ކަށަވަރު ކުރެވެންދެން، އެބްރޭންޑްގެ ބޭސް ރާއްޖޭގައި ވިއްކުމާއި ބޭނުން ކުރުމަކީ މަނާކަމެއް ކަމުގައި، އާއްމުކޮށް އަންގައި އިއުލާނުކުރާކަމުގައި އެމްއެފްޑީއޭއިން ވަނީ ބުނެފައެވެ.