މިފްކޯގެ ފްލީޓަށް އިތުރު ކުރުމަށް ގަނެފައިވާ ތިން ބޯޓުގެ ތެރެއިން އެއްބޯޓު ރާއްޖެއަައުމަށް ދަތުރުފަށާފައިވާ ކަމުގައި މިފްކޯއިން ބުނެފިއެވެ.

އެކުންފުނިން ނެރުނު ބަޔާނެއްގައި ބުނެފައި ވަނީ، މިފްކޯގެ ފްލީޓަށް އިތުރު ކުރުމަށް ގަނެފައިވާ 3 ބޯޓުގެ ތެރެއިން، ޖަޒީރާ 106 ތައިލެންޑުން ރާއްޖެއަށް އައުމަށް ދަތުރު ފަށާފައިވާ ކަމަށެވެ. އަދި އެބޯޓު ރާއްޖެއަށް އައުމަށް ހަމަޖެހިފައި ވަނީ މިހިނގާ ނޮވެމްބަރު މަހުގެ 19 ވަނަ ދުވަހުގައި ކަމަށްވެސް މިފްކޯއިން ވަނީ ބުނެފައެވެ.

ޖަޒީރާ 106 އަކީވެސް ދުވާލަކު 60 ޓަނުގެ މަސް ބްރެއިން ފްރީޒް ކުރެވޭ، އަދި 200 ޓަނުގެ މަސް ރައްކާކުރުމުގެ ކެޕޭސިޓީ ހުރި ބޯޓެކެވެ. މީގެ އިތުރު ދެބޯޓު ގަނެފައިވާ އިރު، އެބޯޓުތައްވެސް ރާއްޖެއަށް ގެނައުމަށް ކުރަންޖެހޭ މަސައްކަތްތައް މިފްކޯއިން ދަނީ ކުރަމުންނެވެ.

މިފްކޯއިން ބުނީ މަސްވެރިކަމުގެ މޫސުމުގައި އެންމެ ރަނގަޅަށް މަސްބާނާ ސަރަހައްދުތަކަށް ދަތުރުކޮށް، މަސްވެރިން ބާނާ މަސް ކިރުމަށް ދިމާވާ، ދަތިތަކަށް ހައްލެއް ހޯދުމުގެ ގޮތުން، މިފްކޯއިން މިއަހަރުގެ ތެރޭގައި 4 ބޯޓު ގަނެފައިވާ ކަމަށެވެ. މިގޮތުން މާރިޗު މަހުގެ ތެރޭގައި ރާއްޖެ ގެނައި ޖަޒީރާ 103 ގެންދަނީ ދެކުނުގެ އަތޮޅުތަކުގައި މަސްގަތުމުގައި ހަރަކާތްތެރިވަމުން ކަމުގައިވެސް މިފްކޯއިން ބުނެފައިވެއެވެ. ޖަޒީރާ 103 އަކީ، ދުވާލަކު 120 މެޓްރިކްޓަނުގެ މަސް ގަނޑުކުރެވޭ، އަދި 420 މެޓްރިކްޓަނުގެ މަސް ގަނޑުކޮށް ރައްކާކުރެވޭ ކެޕޭސިޓީ ހުރި ބޯޓެކެވެ. 

މިފްކޯއިން ބުނީ، މިދައުރުގެ ތެރޭގައި މިފްކޯއަށް ގަންނަ މަހުގެ ކެޕޭސިޓީ އިތުރު ކުރުމުގެ ގޮތުން، ކެރިއަރ ބޯޓަކާއި އެކު ޖުމްލަ 6 ބޯޓު މިފްކޯގެ ފްލީޓަށް އިތުރު ކުރެވިފައިވާ ކަމަށެވެ. އަދި މިއަހަރު ނިމުމުގެ ކުރިން ހުރިހާ ބޯޓުތަކެއްވެސް ރާއްޖެ ގެނެވި އޮޕަރޭޝަނަށް ނެރެވުމުން، މުޅި ރާއްޖޭގައި މަސްވެރިކަން ރަނގަޅު ދުވަސްވަރު މަސްގަތުމުގައި ކުރިމަތިވާ ދަތިތަކަށް ހައްލު ލިބިގެންދާނެ ކަމުގައި މިފްކޯއިން ވަނީ ބުނެފައެވެ.