މާލޭގެ މަގުމަތިން ފެނުނު ކުޑަ ކަންޒު ކަނހަބެއް، އީޕީއޭގެ ބެލުމުގެ ދަށުން ކ. ކާށިދޫއަށް ގެންގޮސް އެރަށުގައި ކަންޒު ކަހަނބު ދިރިއުޅޭ ޗަސްބިމަށް ދޫކޮށްލައިފިއެވެ.

ކ. ކާށިދޫއަކީ ޤުދުރަތީ ގޮތުން ރާއްޖޭގައި ކަންޒު ކަހަނބު އާލާވެ ދިރިއުޅޭ މަދު ރަށްތަކުގެ ތެރޭގައި ހިމެނޭ ރަށެކެވެ. އީީޕީއޭން މިއަދު ކުރި ޓްވީޓެއްގައިި ބުނެފައި ވަނީ، މާލެއިން އެކަންޒު ކަހަނބު ފެނިފައި ވަނީ މިހަފްތާގެ ކުރީކޮޅުގައި ކަމަށެވެ. އަދި އެކަންޒު ކަހަނބު ކާށިދޫގެ ޗަސްބިމަށް ދޫކޮށްލީ، ކާށިދޫ ކައުންސިލްގެ އެހީތެރިކަމާއި އެކުގައި ކަމަށްވެސް އީޕީއޭއިން ވަނީ ބުނެފައެވެ.

ކަންޒު ކަހަނބަކީ، ތިމާވެށި ރައްކާތެރި ކުރުމާއި ހިމާޔަތް ކުރުމުގެ ޤާނޫނުގެ ދަށުން ހިމާޔަތްކޮށްފައިވާ އެއްޗެކެވެ. އެހެންވެ އެއްވެސް ފަރާތަކުން ޕެޓްގެ ގޮތުގައި ކަންޒު ކަހަނބު ގެންގުޅޭނަމަ އީޕީއޭ ހަވާލުކުރުމަށާއި އަދި އެފަދަ މައުލޫމާތެއް ލިބިފައިވާ ނަމަ އީޕީއޭއަށް އެކަން ހިއްސާކުރުމަށްވެސް އީޕީއޭއިން ވަނީ އެދިފައެވެ.

މާލެއިން ފެނުނު ކަންޒު ކަހަނބު ދޫކޮށްލި، ކ. ކާށިދޫއަކީ ރާއްޖޭގައި ކަންޒުކަހަނބުގެ އެންމެ ބޮޑު އާބާދީއެއް ދިރިއުޅޭ ރަށެވެ. އަދި އެރަށުގެ ޗަސްބިމަކީ، ކަންޒުކަހަނބު ދިރިއުޅަށާއި ބިސްއަޅައި އާލާވުމަށް އެކަށީގެންވާ މާހައުލެއް އޮތް، ތިމާވެށި ރައްކާތެރި ކުރުމާއި ހިމާޔަތްކުރުމުގެ ޤާނޫނުގެ ދަށުން ހިމާޔަތްކޮށްފައިވާ ތަނެކެވެ.