ރައްޔިތުންގެ މަޖިލީހުގެ ޖަލްސާތައް ކުރިޔަށް ނުގެންދެވި ހުއްޓިފައި އޮތް އޮތުމާއި ގުޅޭ ގޮތުން، މަޖިލީހުގެ މެޖޯރިޓީ ޕާޓީ އެމްޑީޕީން ސްޕްރީމްކޯޓަށް ހުށައެޅި މައްސަލައިގެ އަޑުއެހުންތައް ނިންމާލައިފިއެވެ.

އިއްޔެ މިމައްސަލައިގެ އަޑުއެހުންތައް ނިންމާ ނުލެވުނީ މައްސަލައިގެ ތެރެއަށް ތަދައްޚުލްވި ދަ ޑިމޮކްރެޓްސްއަށް އެފަރާތުން ހުށައަޅަން ބޭނުންވާ ނުކުތާތައް ހުށައެޅުމަށް ތައްޔާރު ނުވެވޭ ކަމަށް ބުނެ ޝަރީއަތުގެ މަޖިލީހުގައި އިތުރު ފުރުޞަތަކަށް އެދުމުންނެވެ.

އެމްޑީޕީން މަޖިލީހަށް ހުށައެޅި މިމައްސަލައަކީ، ޤާނޫނު އަސާސީއާ ރައްޔިތުންގެ މަޖިލީހުގެ ޤަވާއިދުގައި މަޖިލީހުގެ ޖަލްސާތައް ކުރިޔަށް ގެންދިޔުމާ ގުޅޭ ގޮތުން ހިމަނާފައިވާ މާއްދާތައް މާނަކުރުމުގައި، އުފެދިފައިވާ ޚިޔާލުތަފާތުވުންތަކާއި ގުޅިގެން ހުށައެޅި ދުސްތޫރީ މައްސަލައެކެވެ.

ރައްޔިތުންގެ މަޖިލީހުގެ ޤަވާއިދުގައި ބަޔާންކޮށްފައިވާ ގޮތުގައި، ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ހުށައަޅައި ނޯޓިހުގެ މުއްދަތު ހަމަވުމަަށްފަހުގައި އެހެން ކަމެއް މަޖިލީހުގައި ކުރިޔަށް ގެންދެވޭނީ، އިތުބާރު ނެތްކަމުގެ މައްސަލައިގައި ގޮތެއް ނިންމުމަށްފަހުގައެވެ. ރައްޔިތުންގެ މަޖިލީހުގެ 48 މެމްބަރުން ސޮއެކުރައްވައި ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅައި 14 ދުވަހުގެ ނޯޓިސް ހަމަވުމާއިއެކު، މަޖިލީހުގެ ނައިބު ރައީސް އީވާ އަބުދުﷲ ގެންދަވަނީ، އާލާސްކަންފުޅާއި އުޅުއްވާކަމަށް ވިދާޅުވެ މަޖިލީހުގެ އިދާރާއަށް ތަކުރާރުކޮށް، ސަލާމް ފޮނުއްވަމުންނެވެ. މަޖިލީހުގެ ޤަވާއިދުގައި ބަޔާންކޮށްފައިވާ ގޮތުގައި، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިޔަށް ގެންދާ މަޖިލީހުގެ ޖަލްސާގެ ރިޔާސަތު ބަލަހައްޓަވަން ޖެހޭނީ މަޖިލީހުގެ ނައިބު ރައީސެވެ. އެހެންވެ އީވާ އާލާސްކަންފުޅާ އުޅުއްވާކަމަށް ވިދާޅުވެ މަޖިލީހުގެ ޖަލްސާއަށް ވަޑައިނުގަންނަވާތީ، އެމްޑީޕީން ސްޕްރީމްކޯޓަށް މައްސަލަ ވެއްދީ، މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް މަޖިލީހުން ކަނޑައަޅާފައިވާ މެމްބަރުންގެ ތެރެއިން މެމްބަރަކު ރިޔާސަތުގައި އިންނަވައިގެން އެމައްސަލަ ކުރިޔަށް ގެންދެވޭނެ ގޮތެއް ހޯއްދެވުމަށެވެ.

އިއްޔެއާ މިއަދު ސްޕްރީމްކޯޓުގައި ކުރިޔަށް ދިޔަ މިމައްސަލައިގައި މައްސަލަ ހުށައެޅި ފަރާތުންނާއި، މައްސަލަ ރައްދުވާ ރައްޔިތުންގެ މަޖިލީހުގެ ފަރާތުންނާއި، މައްސަލައިގެ ތެރެއަށް ތަދައްޚުލްވި ޕީޕިއެމް ޕީއެންސީގެ ފަރާތުންންނާއި ދަ ޑިމިކްރެޓްސްގެ ފަރާތުން ވަނީ ވާހަކަދައްކަވާފައެވެ.

މިމައްސަލައިގެ އަޑުއެހުންތައް ނިންމަވާލައްވަމުން، ސްޕްރީމްކޯޓުގެ ފަނޑިޔާރުގެ ބެންޗުގެ ރިޔާސަތު ބެލެހެއްޓެވި ފަނޑިޔާރު މަހާޒު ޢަލީ ޒާހިރު ވިދާޅުވީ، ވީއެންމެ އަވަހަކަށް މިމައްސަލައިގައި ގޮތެއް ނިންމޭތޯ ޝަރީއަތުން މަސައްކަތް ކުރައްވާނެ ކަމަށެވެ. އެހެން ނަމަވެސް މިއަދުގެ ޝަރީއަތުގެ މަޖިލިސް ނިންމަވާލެއްވިއިރު، ދެން ޝަރީއަތުގެ މަޖިލީހެއް ބާއްވާނެ ތާރީޚާއި ވަގުތެއް އިއުލާނެއް ނުކުރައްވައެވެ.