ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ޢިތުބާރު ނެތްކަމުގެ މައްސަލަ ކުރިޔަށް ނުގެންދެވި މަޖިލީހުގެ ޖަލްސާތައް ހުއްޓިފައި އޮތް ނަމަވެސް އެކަމަކީ، އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރެއްވުމަށް ހުރަހެއް އޮތް ކަމެއް ނޫންކަމުގައި ބަންޑާރަ ނައިބުގެ އޮފީހުން ބުނެފިއެވެ.

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިޔަށް ގެންދިޔަ ނުދީ މަޖިލިސް ހުއްޓުވާފައިވާ މައްސަލައަށް ހައްލެއް ހޯދުމަށް، އެމްޑީޕީން ދިވެހިރާއްޖޭގެ ސްޕްރީމްކޯޓަށް ހުށައަޅާފައިވާ މައްސަލައިގެ ފުރަތަމަ އަޑުއެހުން މިއަދު ވަނީ ބާއްވާފައެވެ. މި އަޑުއެހުމުގައި، ބަންޑާރަ ނައިބުގެ އޮފީސް ތަމްސީލް ކުރެއްވި ފާޠިމަތު ޙަލީމްގެ ވާހަކަފުޅުގައި ވިދާޅުވީ، މަޖިލީހަށް ހުށައެޅިފައިވާ މައްސަލަތައް މަޑުޖެހިފައި ވީނަމަވެސް، އައު ރައީސް ހުވާކުރެއްވުމުގެ ޖަލްސާ ނުބޭއްވޭނެ ޤާނޫނީ ހުރަހެއް ނެތްކަމަށެވެ.

ފާޠިމަތު ޙަލީމް ވިދާޅުވީ، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައެޅިފައި ވަނިކޮށް ކުރިޔަށް ނުގެންދެވޭނީ ދެކަމެއް ކަމަށެވެ. އެއީ އެހެން މައްސަލައެއްގައި ބަހުސް ކުރުމާއި އެހެން މައްސަލައެއްގައި ވޯޓު ނެގުންކަން އޭނާ ފާހަގަކުރެއްވިއެވެ. އަދި އައު ރައީސް ހުވާކުރުމުގެ ޖަލްސާއަކީ، އެފަދަ ޖަލްސާއެއް ނޫންކަން ބަންޑާރަ ނައިބުގެ ފަރާތްޕުޅުން ފާހަގަކުރެއްވިއެވެ.

އިންތިޚާބީ ރައީސް ޑރ. މުޙައްމަދު މުޢިއްޒާއި އެމަނިކުފާނުގެ ނައިބު ޙުސައިން މުޙައްމަދު ލަޠީފް ހުވާކުރުމަށް ބާއްވާ ޖަލްސާއަކީ ރައްޔިތުންގެ މަޖިލީހުން އިންތިޒާމްކޮށް ބާއްވަން ޖެހޭ ޖަލްސާއެކެވެ. މިޖަލްސާ ބޭއްވުމަށް މިހާރު ހަމަޖައްސާފައި ވަނީ 17 ނޮވެމްބަރު 2023ވާ ހުކުރު ދުވަހުގެ ހަވީރު، 4:45ގައި، ޖުމްހޫރީ މައިދާނުގައެވެ.