ކަޒްމިކް އިންޓަރނޭޝަނަލް އޭ ބުނުމުން ނޭނގޭ ފަރާތްތަކެއް ތިބެދާނެއެވެ. ނަމަވެސް، މި ޕްރޮޑަކްޝަން ހައުސް ފަހަތުގައި ވެސް އޮތީ ކާމިޔާބު ފިލްމުތައް އޮލިމްޕަހަށް ގެނެސްދެމުން އަންނަ އައިފިލްމްސްގެ ޓީމެވެ. 'ބަވަތި' 'ނީނާ' ފަދަ މޮޅު ފިލްމުތަކެއް ގެނެސްދީފައިވާ މި ފަރާތްތަކުން މިފަހަރު މި ގެނެސްދެނީ ކަޒްމިކް އިންޓަރނޭޝަނަލްގެ ފުރަތަމަ ފީޗަރ ފިލްމު 'ފްރީ ޑެލިވަރީ' އެވެ.

ޑާކް ކޮމެޑީ ޖޮންރާއަށް ގެނެސްދޭ މި ފިލްމަކީ ކޮމެޑީގެ އިތުރުން ސަސްޕެންސް ހިމެނޭ ފިލްމުތަކަށް ލޯބިކުރާ ފަރާާތްތަކަށް ރަނގަޅު ފިލްމަކަށް ވާނެއެވެ. ފިލްމުގައި ގިނަ ތަރިންތަކެއް ހިމެނޭއިރު ލީޑު ރޯލް ތަކުން ފެނިގެން ދާނީ ތާތި، އައިޝާ، ރައުފަތު، ޝާރިފް އަދި ވާޝިޔާއެވެ. މީގެއިތުރުން ހާއްސަ ފެނިލުންތަކުން އެތައް ތަރިންނެއް މި ފިލްމުގައި ފެނިގެން ގޮސްފައިވެއެވެ.

ފިލްމުގެ ކުޑަ ރިވިއު އަކަށް ދާނަމަ، ގިނަ ކަންތައްތަކެއް ފިލްމުން ކަމުދިއައެވެ. އޭގެތެރޭގައި އުފައްދާފައިވާ ކެރެކްޓަރ ތަކާއި، ހާލަތްތަކުން ބެލުންތެރިންނަށް ފޫހިނުވެ ފިލްމު ފެށިގެން ނިމެންދެން ބަލާލެވޭނެއެވެ. މެއިން ކާސްޓުގެ އެކްޓިންގ ވެސް ޖުމްލަގޮތެއްގައި ވަރަށް ރަނގަޅެވެ. ބައެއް ޑައިލޮގްތަކުން މުޅި ހޯލު ވެސް ހުނުމުގެ އަޑުން ގުގުމާލައެވެ. ގިނަ ބަޔަކަށް ޔަގީނުން ވެސް އައިޝާގެ ކެރެކްޓަރ ވަރަށް ކަމުދާނެއެވެ. ސަޕޯޓިންގ ކާސްޓުންގެ ތެރެއިން އެންމެ ކޮންފިޑެންޓްކޮށް ފެނުނީ ވަރަށް ކުޑަ ރޯލަކުން ބޮޑު އިމްޕެކްޓެއް ކްރިއޭޓް ކުރި ފައިރޫއެވެ. ދެން ކަމުނުދާ ދެތިން ކަމަކަށް ބަލާލާނަމަ، ސައުންޑް މިކްސިންގ ގައި އުދަނގޫ ކަންތައްތަކެއް ހުއްޓެވެ. އަދި ފިލްމުގެ ކަލަރ ގްރޭޑިންގައި ރޭގަނޑުގެ ބައެއް ސީންތަކުގައި ވަރަށް ކުލަ ގަދަކަން ފާހަގަކުރެވުނެވެ. އަދި ބައެއް ޗޭސް ސީންތައް ތަންކޮޅެއް ދިގުލައިގެން ގޮސްފައި ވެއެެވެ. އެކަމަކު މިއީ އެންމެން އެއްކޮށް ބަލާލަން މަޖާ ދިވެހި ފިލްމަކަށް ވާނެއެވެ. ހުސް ވަލްގަރ ޑަބަލް މީނިންގ ޑައިލޮގްސް ލައިގެން ނޫނަސް ކޮމެޑީ ހެދިދާނެކަން އިއްލެ މިވަނީ މި ފިލްމާއެކު ސާބިތު ކޮށްދީފައެވެ.

'ފްރީ ޑެލިވަރީ' ނޮވެމްބަރ މަހުގެ 04 ވަނަ ދުވަހުން ފެށިގެން މި މަހުގެ ނިޔަލަށް އޮލިމްޕަހުގައި ދެއްކުމަށް ހަމަޖެހިފައިވާއިރު، ޓިކެޓް ބުކް ކުރުމަށް ގުޅުއްވާނީ 7242555 އަށެވެ.