މިއަދު މުޖާހިދުން އިޒްރޭލުގެ ސިފައިންގެ 20 ވުރެ ގިނަ މީހުން މަރާލިކަމަށް ބައެއް މީޑިއާތަކުން ރިޕޯޓްކޮށްފައި ވަނިކޮށް، އަނެއްކާވެސް އިޒްރޭލުން މިރޭ މުޅި ޣައްޒާއިން މުވާޞަލާތީ ޚިދުމަތްތައް މުޅިން ކަނޑާލައި އުތުރު ޣައްޒާއަށާ ޣައްޒާ ސިޓީއަށް ވަރުގަދައަށް ބޮންއަޅަން ފަށައިފިއެވެ.

މުޅިޣައްޒާއިން މުވާޞަލާތީ ޚިދުމަތްތައް މުޅިން ކެނޑިފައިވާކަން، ޣައްޒާގައި އިންސާނީ އެހީ ދިނުމުގައި ހަރަކާތްތެރިވާ އދ.ގެ ޖަމާޢަތުން ވަނީ ބުނެފައެވެ. 

ފާއިތުވި ގަޑިއެއްހާ އިރުގެ ތެރޭގައި އިޒްރޭލުން ވަނީ ޣައްޒާއަށް ސަތޭކައަށް ވުރެ ގިނަ ވައިގެ ހަމަލާތައް ދީފައެވެ. ރޭގަނޑުގެ ވަގުތުތަކުގައި އަމާޒުކުރާ މިހަމަލާތަކުގެ ސަބަބުން މަރުވެގެން ދަނީ ކުށެއްނެތް ކުށަކުދީންނާއި އަންހެނުންނެވެ.

Advertisement

އޮކްޓޫބަރު މަހުގެ 8 ވަނަ ދުވަހުން ފެށިގެން އިޒްރޭލު ސިފައިން ޣައްޒާއަށް ބޮން އަޅަމުންގެންދާއިރު، އުތުރު ޣައްޒާގެ ބައިތު ހަނޫން އާއި ގައްޒާ ސިޓީއާ އަދި ދެކުނުގެ އަވަށް ޚާންޔޫނުސްވެސް ވަނީ ބިމާ ހަމަކޮށްލާފައެވެ.

އިޒްރޭލުގެ ވައިފެ ހަމަލާތަކުގައި މިހާތަނަށް ޣައްޒާގެ 9000 ވުރެ ގިނަ އާއްމުން ޝަހީދުވެފައި ވާއިރު، އޭގެ ތެރެއިން ދެބައިކުޅަ އެއްބަޔަކީ ކުޑަކުދިންނެވެ. އަދި 25000 ވުރެ ގިނަ މީހުން ވަނީ ޒަޚަމްވެފައެވެ.

ހަމާސްއާ ދެކޮޅަށް ހަމަލާތައް ދޭކަމަށް އިޒްރޭލުން ބުނި ނަމަވެސް އިޒްރޭލުގެ މުޅި އަމާޒަކީ، އާއްމުންނަށް ހަމަލާދީ ބިރުގަންނަވައި، ޣައްޒާގެ ހުރިހާ ރައްޔިތުން، މިސްރުގެ ސައިނާ ބިމަށް ނެރެ، ޣައްޒާގެ މައްޗަށް ވެރިވެގަތުމެވެ. ޣައްޒާގެ އައްސޭރި ދާދިފަހުން ވަނީ، ގުދުރަތީ ގޭހުގެ ވަރަށް ބޮޑު ރިޒާވަކާއި ތެޔޮ ފެނިފައެވެ. އިޒްރޭލުގެ މައިގަނޑު ބޭނުމަކީ، ފަލަސްތީނުގެ ސަރަހައްދުގެ ތެރޭގައިވާ، ތެލާއި ގޭހުގެ މައްޗަށް ވެރިވެގަތުމެވެ.