ގެދޮރުވެރިޔާ ސްކީމުން މާލެ ސަރަހައްދުން ފުލެޓަށް އެދި ހުށަހެޅި ފަރާތްތަކުގެ ދާއިމީ ލިސްޓަށް ހުށައަޅާ ޝަކުވާތަކަށް ޖަވާބު ނުދީ ފްލެޓްތައް ހަވާލު ނުކުރުމަށް އޭސީސީން ހައުސިންގ މިނިސްޓްރީއަށް އަންގައިފިއެވެ.

ފްލެޓް ލިބޭ ފަރާތްތައް ހިމަނާފައިވާ ދާއިމީ ލިސްޓް އިއްޔެ އާއްމުކުރުމާއި އެކު ގިނަ ބަޔަކު ވަނީ، ޕޮއިންޓް ދީފައިވާ ގޮތާއި މެދު ހިތްހަމަ ނުޖެހުން ފާޅުކޮށް، އޭސީސީން ފްލެޓްތައް ހަވާލު ކުރުމުގެ މަސައްކަތް ހުއްޓުވުމަށްވެސް ގޮވާލާފައެވެ.

މިކަމާއި ގުޅިގެން އޭސީސީން މިއަދު މީޑިއާތަކަށް ފޮނުވި މެސެޖުގައި ބުނެފައި ވަނީ، ގެދޮރުވެރިޔާ ސްކީމްގެ ދަށުން ދޫކުރާ ފުލެޓްތަކުގެ އެއްބަސްވުމުގައި ސޮއިކުރުމާއި، އެ ފުލެޓުތައް ހަވާލުކުރުމާ ގުޅުންހުރި އެންމެހާ މަސައްކަތްތައް ޝަކުވާތައް ބަލައި ނިމެންދެން ކުރިޔަށް ނުގެންދިޔުމަށް ހައުސިންގ މިނިސްޓްރީއަށް އަންގާފައިވާ ކަމަށެވެ. އަދި ޕޮއިންޓު ދީފައިވާގޮތާމެދު ޝަކުވާ ހުށަހެޅުމަށް އެކަށީގެންވާ މުއްދަތެއް ދިނުމަށާއި، އެ ޝަކުވާތަކަށް ބެލުމަށްފަހު ނޫނީ ފްލެޓްތައް ހަވާލުކުރުމާއި ގުޅޭ އެއްވެސް މަސައްކަތެއް ކުރިޔަށް ނުގެންދިޔުމަށް ހައުސިންގ މިނިސްޓްރީއަށް އަންގާފައިވާ ކަމުގައިވެސް އޭސީސީން ވަނީ ބުނެފައެވެ.

އޭސީސީން ހައުސިންގ މިނިސްޓްރީއަށް މި އެންގުން އަންގާަފައި ވާއިރު، އެމިނިސްޓްރީން ވަނީ މިއަދުން ފެށިގެން މިމަހުގެ 9 ވަނަ ދުވަހާއި ހަމައަށް ދާއިމީ ލިސްޓަށް ޝަކުވާ ހުށައެޅުމުގެ ފުރުޞަތު ހުޅުވާލާފައެވެ. އަދި ޝަކުވާ ހުށައެޅޭނީ ޕޯޓަލް މެދުވެރިކޮށް ކަމުގައިވެސް ހައުސިން މިިނިސްޓްރީން ވަނީ ބުނެފައެވެ.