އިންގްލިޝް ޕްރިމިއަރ ލީގުގައި ހޮނިހިރު ދުވަހުގެ ރޭ ނިއުކާސްލް ޔުނައިޓެޑްގެ ސޓ. ޖޭމްސް ޕާކްގައި އެ ޓީމުން އާސެނަލްއާ ބައްދަލުކުރި މެޗުން ކުރި ހޯދައި، މި ސީޒަންގައި އާސެނަލް ބަލިނުވެ ހިފަހައްޓަމުން އައި ރެކޯޑަށް ނިމުމެއް ގެނުވައިފިއެވެ. ނިއުކާސްލްއިން 1-0 އާސެނަލްގެ މައްޗަށް ކުރިހޯދިއިރު، އެ ޓީމުގެ ގޯލު ކާމިޔާބުކޮށްދިނީ 64 ވަނަ މިނެޓުގައި އެންތޮނީ ގޯޑަންއެވެ.

ނިއުކާސްލްގެ ގޯލު ވެގެން ދިޔައީ ވަރަށް ބޮޑު ބަހުސަކަށެވެ. މެޗަށްފަހު އޮތް ނޫސްވެރިންގެ ބައްދަލުވުމުގައި އާސެނަލްގެ ކޯޗު، މައިކަލް އާޓެޓާ ބުނެފައިވާ ގޮތުގައި އެއީ ގޯލެއް ނޫންކަމަށާއި، މިފަދަ ނިންމުމެއް ޕްރިމިއަލީގުގައި ފެނިގެން ދިއުމަކީ ލީގަށް ލިބުނު ލަދުވެތިކަމެއް ކަމަށެވެ. 

ނިއުކާސްލްގެ ގޯލު ފެނުނީ އެޓީމުން އުފެއްދި ކައުންޓަރ އެޓޭކެއްގެ ތެރެއިންނެވެ. އާސެނަލްގެ ގޯލް އޭރިޔާ ކައިރިން ކޯނަރު ދަނޑިކައިރިން ބޭރުވާން ދިޔަ ބޯޅަ ހޯދީ ބަދަލު ކުޅުންތެރިއެއްގެ ގޮތުގައި ނިކުތް ނިއުކާސްލްގެ ޖޯ ވިލޮކްއެވެ. ބޯޅަ ހޯދުމަށްފަހު ވިލޮކް ހުރަސްކުރި ބޯޅަ ދިޔައީ އާސެނަލްގެ ކީޕަރު، ޑޭވިޑް ރަޔާގެ ބޯ މަތިން އޭނާގެ ފަހަތުގައި ހުރި ޖޯލިންޓަން ބޮލަށެވެ. ޖޯލިންޓަން ބޮލުން ތިރިޔަށް ޖައްސާލި ބޯޅަ ގޯޑަންއަށް ލިބުމާއެކު، މުޅިން ހުހަށް އޮތް އާސެނަލްގެ ގޯލު ތެރެއަށް އޭނާ ބޯޅަ ފޮނުވާލިއެވެ.

މި ގޯލު ރަގަޅު ތޯ ބެލުމަށް ވީޑިއޯ އެސިސްޓެންޓް ރެފްރީ (ވީ.އޭ.އާރު.) ބެލުމަށް ގިނަ ވަގުތު ހޭދަވިއެވެ. މި ގޯލުގައި ޝައްކު އުފެދޭ 3 ކަމެއް އޮތެވެ. އެއީ ފުރަތަމަ ވިލޮކް ބޯޅަ ހޯދިއިރު އެ ބޯޅަ ދަނޑުން ބޭރުވެފައިވޭތޯ ބެލުމަށާއި، ޖޯލިންޓަން ބޮލުން ޖެއްސިއިރު އާސެނަލްގެ ޑިފެންޑަރަށް ފައުލްކޮށްފައިވޭތޯ ބެލުމަށާއި، އަދި އެ ބޯޅަ ކުޅުނުއިރު ގޯޑަން ހުރީ އޮފްސައިޑްގަތޯ ބެލުމަށެވެ. ވީޑިއޯތަކުން ފެންނަގޮތުގައި ބޯޅަ ދަނޑުން ބޭރުވެ، އަދި ޖޯލިންޓަން ފައުލްކޮށްފައިވީނަމަވެސް، ވީޑިއޯ އެސިސްޓެންޓް ރެފްރީ ނިންމީ އެއީ ގޯލެއް ކަމަށެވެ. 

ނިއުކާސްލްގެ ގޯލަށް ފަހު މެޗު ކާމިޔާބު ކުރެވޭތޯ އާސެނަލްއިން އިތުރަށް މަސައްކަތްކުރިއެވެ. ނަމަވެސް، ނިއުކާސްލް ކުޅުންތެރިން ކުރި ބުރަ މަސައްކަތުން، އޭގެ ފަހުން އާސެނަލްއަށް ގޯލާ އަމާޒުކޮށް ޝޮޓެއް ވެސް ފޮނުވާލެވިފައެއް ނުވެއެވެ.

މި މެޗުން މޮޅުވިނަމަ، ލީގުގެ އެއްވަނައިގައި މިވަގުތު އޮތް މެންޗެސްޓަރ ސިޓީއާ ޕޮއިންޓުގެ ގޮތުން އާސެނަލްއަށް ހަމަހަމަ ކުރެވުނީހެވެ. ނަމަވެސް، މި މެޗުން ޕޮއިންޓެއް ނުލިބުމުން އާސެނަލް އޮތީ 24 ޕޮއިންޓާއެކު ތިންވަނައިގައެވެ. އަދި ނިއުކާސްލް އޮތީ 20 ޕޮއިންޓާއެކު ލީގުގެ ހަވަނައިގައެވެ.