61 ވަނަ ގައުމީ ޓޭބަލް ޓެނިސް މުބާރާތުގެ ފުރަތަމަ ޑިވިޝަންގެ އަންހެން ސިންގަލްސް ޗެމްޕިއަންކަން ފާތިމަތު ދީމާ އަލީ ހޯދައިފިއެވެ. ބުރާސްފަތި ދުވަހުގެ ރޭ ކުޅުނު މެޗުން ދީމާ މި ހޯދި ކާމިޔާބީއާއެކީ، އޭނާ ވެގެން ގޮސްފައިމިވަނީ ވިދިވިދިގެން ގައުމީ ތަށި 4 ފަހަރު ހޯދި ހަމައެކަނި ކުޅުންތެރިޔާއަށެވެ.

މި ފަހަރު ފައިނަލުގައި ދީމާ ބައްދަލުކުރީ ފާތިމަތު ޖުމާނާ ނިމާލްއާ ދެކޮޅަށެވެ. މި މެޗު ދީމާ ގެންދިޔައީ ސީދާ 4 ސެޓުން، 11-9، 11-6، 11-6، އަދި 11-5 އިންނެވެ.

ގައުމީ މުބާރާތުގައި މިދިޔަ 3 ފައިނަލުގައި ވެސް ދީމާ ވާދަކުރި ރަފާ ނާޒިމް މިފަހަރުގެ މުބާރާތުގައި ނުކުޅެއެވެ. ރަފާ ހުރީ މަތީ ތައުލީމް ހާސިލް ކުރުމަށް މިވަގުތު އިނގިރޭސިވިލާތުގައެވެ. ދީމާ ފައިނަލަށް ދަތުރުކޮށްފައިވަނީ ސެމީ ފައިނަލުގައި މަލާކު ބިންތި މުއިއްޒު ބަލިކުރުމަށް ފަހުއެވެ. އަދި ޖުމާނާ ފައިނަލް ކަށަވަރުކުރީ އުއްމީދީ ތަރި މިޝްކާ މުހައްމަދު އިބްރާހިމް ބަލިކޮށްފައެވެ.

މި މުބާރާތުގައި ދީމާ ވާދަކުރި އެހެން އިވެންޓްތަކުން ގެއްލިފައިވަނީ މިކްސް ޑަބަލްސް އެކަންޏެވެ. މުހައްމަދު ޝައްފާން އިސްމާއީލާ ހިއްސާވެ، އެ ޕެއާ ފައިނަލުގައި ބަލިވީ ތަޖުރިބާކާރު ދެ ކުޅުންތެރިން ކަމަށްވާ ޖުމާނާ އާއި މޫސާ މުންސިފް އަހުމަދުގެ ޕެއާ އަތުންނެވެ. ދީމާ ވަނީ 17 އަހަރުންދަށުގެ ސިންގަލްސް ޗެމްޕިއަންކަމާއި އަދި މިޝްކާ މުހައްމަދު އިބްރާހިމްއާ ހިއްސާވެ އެ އުމުރުފުރާގެ ޑަބަލްސް ޗެމްޕިއަންކަން ވެސް ހޯދާފައެވެ.