61 ވަނަ ގައުމީ ޓޭބަލް ޓެނިސް މުބާރާތުގެ ފުރަތަމަ ޑިވިޝަންގެ ފިރިހެން ސިންގަލްސް ޗެމްޕިއަންކަން މުޙައްމަދު ޝައްފާން އިސްމާއީލް ދިފާއުކޮށްފިއެވެ. ޝައްފާން މި ތަށި ކާމިޔާބުކުރީ ބުރާސްފަތި ދުވަހުގެ ރޭ މޫސާ މުންސިފް އަޙްމަދު ބަލިކުރުމަށްފަހުއެވެ.

މުންސިފްއަކީ މި ތަށި 11 އަހަރު ހޯދާފައިވާ ރާއްޖޭގެ އެންމެ ކާމިޔާބު ޓޭބަލް ޓެނިސް ކުޅުންތެރިޔާއެވެ. ނަމަވެސް މުންސިފް ބަލިކުރަން މިހާރު ޝައްފާން ދަސްކޮށްފިއެވެ. މިދިޔަ އަހަރުގެ ގައުމީ ފައިނަލްގައި މުންސިފް ބަލިކުރުމުގެ އިތުރުން، ޝައްފާންގެ މި ތައްޓަކީ މުންސިފާ ދެކޮޅަށް މި އަހަރު ހޯދި ދެވަނަ ތައްޓެވެ. މިދިޔަ ހަފުތާގައި ނިމިގެން ދިޔަ އެސޯސިއޭޝަން ކަޕްގެ ޗެމްޕިއަންކަން ވެސް އޭނާ ހޯދީ މުންސިފް ބަލި ކުރުމަށް ފަހުއެވެ.

މިދިޔަ އަހަރުގެ ގައުމީ ފައިނަލުގައި ވާދަކުރީވެސް މި ދެ ކުޅުންތެރިންނެވެ. މިދިޔަ އަހަރުގެ ފައިނަލް މެޗު ޝައްފާނަށް ލިބުނީ މެޗުގެ ތެރެއިން އަނިޔާވެ މުންސިފް މެޗު ދޫކޮށްލުމުންނެވެ. މުންސިފް މެޗު ދޫކޮށްލިއިރު ކުރީގައި އޮތީވެސް ޝައްފާންއެވެ. މި ދެ ކުޅުންތެރިން ވަނީ މިދިޔަ ހަފްތާގައި ނިމުނު އެސޯސިއޭޝަން ކަޕްގެ ސިންގަލްސް ފައިނަލުގައިވެސް ވާދަކޮށްފައެވެ. މި މެޗު ޝައްފާން ކާމިޔާބުކުރީ މުންސިފް ދެ ސެޓު ހޯދާފައިވަނިކޮށް ފަހަތުން އަރާ ހަތަރު ސެޓު ހޯދައިގެންނެވެ.

ގައުމީ މުބާރާތުގެ ފައިނަލުގައި މުންސިފް ބަލިކުރީ، އޭނާ ފުރަތަމަ ސެޓު 11-8 ހޯދާފައިވަނިކޮށް ފަހަތުން އަރާ 4 ސެޓު ކާމިޔާބުކޮށްގެންނެވެ. މެޗުގެ ފަހު ހަތަރު ސެޓު ޝައްފާން ކާމިޔާބުކުރީ 11-6، 11-6، 11-6 އަދި 11-7 އިންނެވެ.

މި އަހަރުގެ ގައުމީ މުބާރާތުގެ ފުރަތަމަ ޑިވިޝަންގެ ފިރިހެން ޑަބަލްސް ޗެމްޕިއަންކަން ހޯދި ޕެއާގައި ވެސް ޝައްފާން ހިމެނެއެވެ. އޭނާ އާއި މުހައްމަދު ތާބިން ސުޖާއުގެ ޕެއާ ޗެމްޕިއަންކަން ހޯދި އިރު، ރަނާސްއަޕްއަކީ މޫސާ މުންސިފް އަހުމަދު އާއި އަލީ އާދަމް މަނިކު (އަލިބެ) އެވެ. މިކްސް ޑަބަލްސް ޗެމްޕިއަންކަން ހޯދީ މުންސިފް އާއި ޖުމާނާއެވެ. އަދި ދެވަނަ ހޯދީ ޝައްފާން އާއި ދީމާއެވެ.