ކުރިޔަށް އޮތް ރިޔާސީ ދައުރުގައި، ދިވެހިރާއްޖޭގެ ނަޞްރުގެ ދުވަސް ކުލަގަދަކޮށް ފާހަގަކުރައްވާނެ ކަމުގައި އިންތިޚާބީ ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފާހަގަކުރާ ދިވެހިރާއްޖޭގެ ނަޞްރުގެ ދުވަހުގެ މުނާޞަބަތުގައި ކުރެއްވި ޓްވީޓްގައެވެ.

އިންތިޚާބީ ރައީސް ވިދާޅުވީ، ނަަސްރުގެ ދުވަހުގެ ޒިކުރާ އާކޮށް އެ ދުވަހާއި ބެހޭ މަޢުލޫމާތު، ޚާއްސަކޮށް ޒުވާނުންނަށް ފުރިހަމަ ގޮތުގައި ފޯރުކޮށްދިނުމުގެ މުހިއްމު ކަމަށްޓަކައި، 2024 އިން ފެށިގެން ނަސްރުގެ ދުވަހަށް ދޭންޖެހޭ ސަމާލުކަން ސަރުކާރުން ފުރިހަމަޔަށް ދެއްވާނެ ކަމަށެވެ.

ދިވެހި ރާއްޖޭގެ ނަޞްރުގެ ދުވަހުގެ ގޮތުގައި ފާހަގަކުރަނީ، ކޮންމެ އަހަރެއްގެވެސް ނޮވެމްބަރު މަހުގެ 3 ވަނަ ދުވަހެވެ. އެދުވަހަކީ، ދިވެހި ޚާއިނުންތަކެއް ދިވެހި ދައުލަތުގެ ޤާނޫނީ ވެރިކަން ވައްޓާލުމަށް، ހަތިޔާރާއި އެކު މާލެ އަރައި، ބޮޑު ލޭ އޮހޮރުވެއް ހިންގި ދުވަހެވެ. 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުގެތޭ ފަތިހު، ތަމަޅަ ޓެރަރިސްޓުންގެ ބަޔަކާއި އެކު މާލެއަށް ހަމަލަދިނުމުގައި އެންމެ އިސްކޮށް ތިބީ، ހ. ހާޖަރާގޭ ޢަބުދުﷲ ލުޠުފީއާ، ސަގަރް އަހުމަދު ނާޞިރެވެ. އެދުވަހުގެ އުދުވާނުގައި، ދިވެހި ސިފައިންގެ ތެރެއިން 8 ބޭކަލުންނާއި، އާއްމުންގެ ތެރެއިން 11 މީހަކު ޝަހީދުކޮށްލިއެވެ.

ދިވެހި ސިފައިންގެ ރައްދު ހަމަލާތަކުގައި، ޓެރަރިސްޓުންގެ އެންމެ އިސް ތިން މީހުން ވަނީ، ހަމަލާތަކުގެ ފުރަތަމަ 3 ގަޑިއިރުގެ ތެރޭގައި މަރާލާފައެެވެ. އެ ޢުދުވާނީ ހަމަލާގައި ދިވެހީންނަށް ނަޞްރު ލިބުނުކަން އޭރުގެ ރައީސުލްޖުމްހޫރިއްޔާ އަލްއުސްތާޛު މަޢުމޫނު ޢިއުލާނު ކުރެއްވީ، ނޮވެމްބަރު މަހުގެ 4 ވަނަ ދުވަހުގެ ހެނދުނު 8:45ގައި ދިވެހި ރާއްޖޭގެ އަޑު މެދުވެރިކުރައްވައި ޤައުމާ މުޚާތަބު ކުރައްވަމުންނެވެ.

ރައީސް މައުމޫނުގެ ވެރިކަމުގެ 1989 އިން ފެށިގެން 2007 ވަނަ އަހަރާއި ހަމައަށް ވަރަށް ކުލަގަދަ ގޮތެއްގައި ނަޞްރުގެ ދުވަސް ފާހަގަކުރަމުން އައެވެ. 2008 ވަނަ އަހަރު އެމްޑީޕީއަށް ދިވެހިރާއްޖޭގެ ވެރިކަން ލިބުނު އިރު ސަރުކާރުގެ އިސް މަޤާމުތަކުގައި ތިބި މީހުންގެ ތެރޭގައި، އެކި ސިފަސިފައިގައި ނޮވެމްބަރު 3 ގެ އުދުވާނީ ހަމަލާގައި ބައިވެރިވިކަމަށް ތުހުމަތު ކުރެވުނު މީހުން ތިއްބެވެ. އަދި ރައީސް ނަޝީދު ވެރިކަމަށް އިންތިޚާބު ވުމާއިއެކު، ބަޔަކު، ހެންވޭރު ސަހަރާގައި އޮންނަ ނޮވެމްބަރު 3 ގެ ޝަހީދުންގެ ބިސްތާނަށް ގެއްލުންތައްވެސް ދިނެވެ.