ބޭރުގެ ގިނަ ޔުނިވަރސިޓީތަކާއިއެކު މި ހަފްތާގައި "އިންޓަރނޭޝަނަލް ހަޔަރ އެޑިޔުކޭޝަން އެކްސްޕޯ 2023" ބޭއްވުމަށް ހަމަޖައްސައިފިއެވެ. މިއީ ޒީޑް އިންޓަރނޭޝަނަލްގެ ފަރާތުން އިންތިޒާމުކޮށްގެން ބާއްވާ ހަރަކާތެކެވެ.

މި އެކްސްޕޯ ކުރިއަށްދާނީ މި މަހުގެ 3 އިން 4 އަކަށެވެ. އެކްސްޕޯ އޮންނާނީ މީރުމާ ހޮޓެލްގެ އިވެންޓް ހޯލުގައި ހަވީރު 4:00 އިން ރޭގަނޑު 10:00 އަށެވެ. މި އެކްސްޕޯއަކީ އޯލެވެލް އަދި އޭލެވެލް ނިންމާ ދަރިވަރުންނަށް އަމާޒުކޮށްގެން ބާއްވާ އެކްސްޕޯއެކެވެ. އެގޮތުން މިފަހަރުގެ އެކްސްޕޯގައި ކެރިއަރ ގައިޑެންސް ދިނުމާއި، ޑޮކްޓަރުކަން ކިޔަވަން ރާއްޖޭން ބޭރަށް ދާން ބޭނުންވާ ދަރިވަރުންނަށް ހުރި ފުރުޞަތުތަކަކީ ކޮބައިކަން އަންގައިދޭނެއެވެ. އަދި ރާއްޖޭން ބޭރުގައި ހުރި ޑިގްރީ އަދި މާސްޓަރސްގެ ސްކޮލަރޝިޕް ފުރުޞަތުތަކާއި ގުޅޭ މައުލޫމާތު ހިއްސާކުރެވޭނެއެވެ.

މި އެކްސްޕޯގައި ދުނިޔޭގެ ފެންވަރުގައި ފާހަގަކޮށްލެވޭ 45 އަކަށްވުރެ ގިނަ ޔުނިވަރސިޓީތަކުން ބައިވެރިވާނެއެވެ. އޭގެ ތެރޭގައި މެލޭޝިއާ، އޮސްޓްރޭލިއާ، އިނގިރޭސިވިލާތް، ދުބާއީ، ސްރީލަންކާ، އިންޑިއާ، ފިލްޕީންސް، ބަންގްލަދޭޝް، ޗައިނާ، ކެނެޑާ އަދި އެމެރިކާގެ މަޤުބޫލު ޔުނިވަރސިޓީތައް ހިމެނެއެވެ.

މި އެކްސްޕޯގައި ބައިވެރިވާން ބޭނުންވާ ދަރިވަރުން ޒީޑް އިންޓަރނޭޝަނަލްގެ އީމެއިލްއަށް ބައިވެރިވާން ބޭނުންވާކަމުގެ ކޮންފަރމޭޝަން އީމެއިލެއް ފޮނުވަންޖެހެއެވެ. އަދި ބައިވެރިވާން އީމެއިލް ފޮނުވާ ބައިވެރިންނަށް ޒީޑް އިންޓަރނޭޝަނަލްގެ ކޮންސަލްޓެންޓުން ހަޔަރ އެޑިއުކޭޝަން އެކްސްޕޯއާ ގުޅޭ އިތުރު މައުލޫމާތު ހިއްސާކުރާނެކަމަށް ޒީޑް އިންޓަރނޭޝަނަލުން ބުނެއެވެ. އެކްސްޕޯއަށް ޒިޔާރަތްކޮށް ބައިވެރިވެ ޑިސްކައުންޓްތަކާއެކު ލެޕްޓޮޕެއް ހޯދުމުގެ ފުރުޞަތުވެސް އޮންނާނެކަމަށް ޒީޑް އިންޓަރނޭޝަނަލުން ބުނެއެވެ.

މިއީ ޒީޑް އިންޓަރނޭޝަލް އިން ހިންގާ ހަޔަރ އެޑިއުކޭޝަން އެކްސްޕޯގެ 3 ވަނަ އެޑިޝަނެވެ. މި އެކްސްޕޯގެ ފުރަތަމަ އެޑިޝަން ބާއްވާފައިވަނީ 2022 ވަނަ އަހަރުއެވެ. އެފަހަރު 200 އަށްވުރެ ގިނަ ދަރިވަރުން ވަނީ އެކްސްޕޯގައި ބައިވެރިވެފައެވެ. ފުރަތަމަ އެޑިޝަނަށް ލިބުނު ތަރުޚީބަށް ބަލާ އެކްސްޕޯގެ ދެވަނަ އެޑިޝަން ކުރިއަށްގެންގޮސްފައިވަނީ މިއަހަރުގެ ފެބްރުއަރީމަހުގައެވެ.