މިއަހަރުގެ މޯލްޑިވްސް ބޯޓިން އެވޯޑަށް ކުރިމަތިލާފައިވާ ފަރާތްތަކަށް އޮންލައިންކޮށް ވޯޓު ދިނުމުގެ ފުރުސަތު ހުޅުވާލައިފިއެވެ.

މޯލްޑިވްސް ބޯޓިންގ އެވޯޑަކީ، ފަތުރުވެރިކަމުގެ ސިނާޢަތުގައި ހަރަކާތްތެރިވާ ސަފާރީތަކަށް ޚާއްސަކޮށް ދެވޭ އެވޯޑެކެވެ. އެވޯޑް ދިނުމުގެ މަޤްސަދަކީ އެފަރާތްތަކުން ކުރާ މަސައްކަތްތަކުގެ އަގުވަޒަންކުރުން ކަމަށް ނޭޝަނަލް ބޯޓިން އެސޯސިއޭޝަނުން ބުނެއެވެ.

ބޯޓިން އެސޯސިއޭޝަނުން ބުނީ ވޯޓުލުމުގެ ފުރުސަތު މިމަހުގެ 20ވަނަ ދުވަހުގެ ނިޔަލަށް ހުޅުވާލާފައިވާކަމަށެވެ. އެވޯޑު ލިބޭ ފަރާތްތައް ހޮވާނީ އޮންލައިންކޮށް ލިބޭ ވޯޓުތަކާއި ޖަޖުންގެ ޕެނަލްއިން ދޭ މާރކްސްއަށް ބެލުމަށްފަހުގައެވެ. ބޯޓިންގ އެވޯޑް ހަފްލާ ދިނުމަށް ހަމަޖެހިފައިވަނީ އަންނަ މަހުގެތެރޭގައެވެ.

Advertisement

މިއަހަރުގެ ބޯޓިން އެވޯޑް 33 ގިންތިއަކުން ދިނުމަށް ހަމަޖެހިފައިވާ ކަމަށް ބޯޓިން އެސޯސިއޭޝަނުން ބުނެއެވެ. މީގެތެރޭގައި ލިވަރބޯޑްތަކާއި ސަފާރީތަކަށްދޭ އެވޯޑްގެ އިތުރުން މިދާއިރާގައި މަސައްކަތްކުރާ ފަރާތްތަކަށްދޭ އެވޯޑްވެސް ހިމެނެއެވެ. އެގޮތުން ކެޕްޓަން، ޝެފް، ކްރޫ މެންބަރ، އިންޖީނިއަރ، ކްރޫޒް މެނޭޖަރ، އޮޕަރޭޝަން ސްޓާފް ފަދަ އެވޯޑް ހިމެނެއެވެ. ނޭޝަނަލް ބޯޓިން އެސޯސިއޭޝަނުން އިންތިޒާމްކޮށްގެން ބާއްވާ މި އެވޯޑަކީ 2016 ވަނަ އަހަރުން ފެށިގެން ދެމުންއަންނަ އެވޯޑެކެވެ.