ޖަބަލިޔާ ރެފިއުޖީ ކޭމްޕަށް އިޒްރާއީލުން ދިން ވައިގެ ހަމަލާގައި އެއްފަހަރާ އެތައް ބަޔަކު ޝަހީދުކޮށްލުމާއި ގުޅިގެން ދިވެހި ސަރުކާރުން އެކަން ކުއްވެރިކޮށްފިއެވެ.

ޚާރިޖީ ވަޒީރު ޢަބުދުﷲ ޝާހިދު ކުރެއްވި ޓްވީޓެއްގައި ވިދާޅުވީ، ޣައްޒާގެ ޖަބަލިއްޔާ ރެފިއުޖީ ކޭމްޕަށް އިޒްރާއީލުން ދިން އަނިޔާވެރި ހަމަލާ ހަރުކަށި ޢިބާރާތުން ކުށްވެރިކުރައްވާކަމަށެވެ. މި ހަމަލާގައި އެތަކެއް މައުސޫމު ރައްޔިތުން ޝަހީދުވެ ގިނަ ބަޔަކު ޒަޚަމްވީ ޚަބަރު އެހީ ފުން ހިތާމަޔާއެކުގައި ކަމަށްވެސް މިނިސްޓަރ ޝާހިދު ކުރެއްވި ޓުވީޓުގައި ލިޔުއްވާފައިވެއެވެ.

އެމަނިކުފާނުގެ ޓްވީޓުގައި، އާއްމު ރައްޔިތުންނަށް އަމާޒުކޮށް އިޒްރާއީލުން ދެމުންގެންދާ ލާއިންސާނީ ހަމަލާތައް ހުއްޓާލުމަށާއި އިންސާނީ ޙައްޤުތަކާބެހޭ ބައިނަލްއަޤްވާމީ ޤާނޫނުތަކަށް ތަބާވުމަށް ތަކުރާރުކޮށް ގޮވާލައްވައި، ޣައްޒާގެ ރައްޔިތުންނަށް އެއްވެސް ހުރަހެއް ނެތި އެހީ ފޯރުކޮށްދެވޭނޭ މަގު ފަހިކޮށްދިނުމަށްވެސްވެސް ވަނީ ގޮވާލާފައެވެ.

އިޒްރޭލުން ޣައްޒާއަށް ވައިގެ މަގުން ހަމަލާދޭން ފެށިތާ މަހެއްވުމާއި ގާތްވެފައި ވާއިރު، މިހާތަނަށް އިޒްރޭލުގެ ހަމަލާތަކުގައި ފަލަސްޠީނުގެ 8500 ވުރެ ގިނަ މީހުން ޝަހީދުވެފައި ވާއިރު، އިމާރާތްތަކުގެ ދަށުވެފައިވާ މީހުންނާއި ގެއްލިފައިވާ މީހުންގެ ހަށިތަކާއި އެކު ޝަހީދުވި މީހުންގެ އަދަދު 10000 އަށްވުރެ މަތިވާނެ ކަމުގައި ފަލަސްޠީނުގެ ރަސްމީ ފަރާތްތަކުން ހާމަކޮށްފައިވެއެވެ.