ދުނިޔޭގައި ފުރަތަމަ ލެޕްރެސީ ފެތުރުން ހުއްޓުވި ޤައުމުގެ ގޮތުގައި ދިވެހިރާއްޖެ ކަނޑައި އެކަމުގެ ލިޔުން ޑަބްލިޔުއެޗްއޯއިން ރާއްޖެއަށް ދީފިއެވެ.

މިލިޔުން ރާއްޖެއަށް ދީފައި ވަނީ، އިންޑިއާގެ ވެރިރަށް، ނިއުދިއްލީގައި މިހާރު ކުރިޔަށްދާ ދުނިޔޭގެ ސިއްހަތު ޖަމިއްޔާ ޑަބްލިއު އެޗްއޯގެ ދެކުނު އިރުމަތީ އޭޝިޔާ ރީޖަން ކޮންފަރެންސްގެ ތެރެއިންނެވެ. ރާއްޖޭގެ ފަރާތުން މިލިޔުމާއި ހަވާލުވެވަޑައިގެންނެވީ، ފޮރިންގ މިނިސްޓަރ އަހުމަދު ނަސީމެވެ. އަދި މިލިޔުން އެމަނިކުފާނާއި ހަވާލުކޮށްދެއްވީ،  ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ދެކުނު އިރުމަތީ އޭޝިއާއަށް ކަނޑައަޅުއްވާފައި ހުންނަވާ ރީޖަނަލް ޑިރެކްޓަރު ޑރ.ޕޫނަމް ކެތްރަޕާލް ސިންގް އެވެ.

ރާއްޖެއިން ޖުޒާމް ބަލި ނުވަތަ ލެޕްރަސީ ނައްތާލުމަށްޓަކައި، ވަނީ 2019 ވަނަ އަހަރުން ފެށިގެން ޚާއްސަ ހަރަކާތްތަކެއް ހިންގާފައެވެ. މިގޮތުން ބައްޔާއި މެދު މީހުން ހޭލުންތެރި ކުރުވުމާއި، ބަލީގެ ހާލަތު ދެނެގަތުމަށާއި، ބަލި ހުރި މީހުން ދެނެގަތުމަށް ސްކްރީން ކުރުމުގެ ޕްރޮގްރާމްތައްވެސް ކުރިޔަށް ގެންގޮސްފައި ވެއެވެ.

މިނިސްޓްރީ އޮފް ހެލްތުން ހާމަކޮށްފައިވާ ގޮތުގައި ރާއްޖޭގައި މިހާރު މީހުންދިރިއުޅޭ 187 ރަށުގެ ތެރެއިން، 178 ރަށަކީ ލެޕްރަސީ ނެތް ރަށްތަކެކެވެ. އަދި މިކާމިޔާބީއަށް ވާސިލްވުމުގައި ކުރެވުނު މަސައްކަތްތަކުގައި ބައިވެރިވި އެންމެހާ ފަރާތްތަކަށް ހެލްތު މިނިސްޓްރީން ވަނީ މަރުޙަބާ ކިޔައި އަދި ޝުކުރު އަދާކޮށްފައެވެ.

ރާއްޖޭގައި 1997 ވަނަ އަހަރުން ފެށިގެން ވަނީ ލެޕްރެސީ ކޮންޓްރޯލްކޮށްފައެވެ.