ޔަމަނުން އިޒްރޭލާއި ދެކޮޅަށް ހަނގުރާމަ އިއުލާނުކޮށް، އިޒްރޭލުގެ ނިއުކުލިއަ ފެސިލިޓީ ދައިމޯނާއަށް ހަމަލާދޭނެ ކަމުގެ އިންޒާރު ދީފިއެވެ.

އިޒްރޭލުގެ ނިއުކްލިއަ ފެސިލިޓީއަށް ހަމަލާދޭނެ ކަމުގެ އިންޒާރުދީފައި ވަނީ، ޔަމަނުގެ އަންސާރުﷲ ޖަމާއަތުންނެވެ. އެޖަމާއަތަކީ، ދުރު ރާސްތާ މިސައިލްތަކުން ހަމަލާ ދިނުމުގެ ޤާބިލްކަން އޮތް ޖަމާޢަތެކެވެ. އެޖަމާއަތުން ވަނީ އިޒްރޭލުގެ ނިއުކުލިއަ ފެސިލިޓީގެ އޭރިއަލް ފޮޓޯއެއް އާއްމުކޮށް، އެޖަމާޢަތުން ހަމަލާ ދިނުމަށް ފަސް ނުޖެހޭނެ ކަމުގައި ބުނެފައެވެ.

އިޒްރޭލާ ދެކޮޅަށް ރަސްމީކޮށް ޔަމަނުން ހަނގުރާމަ އިޢުލާނުކޮށް ހަމަލާތައް ދޭން ފަށާފައި ވާއިރު، ޔަމަން އޮންނަނީ އިޒްރޭލާއި ދުރުގައެވެ. ޔަމަނާއި އިޒްރޭލާއި ދެމެދު، ސަޢޫދީ އަރަބިއްޔާ އާއި އުރުދުން އޮވެއެވެ. އެޤައުމުތަކުގައި އެމެރިކާއިން ވަނީ، ވައިގެ އަސްކަރީ ދިފާޢުތައް ޤާއިމްކޮށްފައެވެ.

ޔަމަނުން އިޒްރޭލަށް ހަމަލާތައް ފޮނުވަން ފެށުމާއި އެކު، ޢަރަބި ޖަޒީރާތަކަށް ހަނގުރާމަ ފުޅާވެގެން ހިނގައިދާނެ ކަމުގެ ނުތަނަވަސްކަން ވަނީ ބޮޑުވެފައެވެ. އަދި އިޒްރޭލުގެ ނިއުކުލިއަ ފެސިލިޓީގައި ނިއުކުލިއަ ހަތިޔާރު ހުރި އިރު، އެފެސިލިޓީއަށް އަމާޒުވާ ހަމަލާއެއްގެ ސަބަބުން ލިބޭ ގެއްލުންތައް އެތައް ގުނައަކަށް އިތުރުވެގެންދާނެއެވެ،