ޔަމަނުގެ ހޫތީ ހަނގުރާމަވެރިން އިޒްރޭލުގެ ދެކުނުގެ ސަރަހައްދުތަކަށް ބެލެސްޓިކް މިސައިލް ހަމަލާތައް ފޮނުވަން ފަށާފައިވާ ކަމަށް އެޖަމާޢަތުން ބުނެފިއެވެ.

ހޫތީ ހަނގުރާމަވެރިން ވަނީ، މީގެ ކުރިންވެސް އިޒްރޭލަށް އަމާޒްކޮށް ބެލެސްޓިކް މިސައިލެއް ފޮނުވާލާފައެވެ. އެހެން ނަމަވެސް ސަޢޫދީ އަރަބިއްޔާގެ މަތިން އެ މިސައިލް ދަތުރުކުރަނިކޮށް، އެމެރިކާގެ މިސައިލުން ދިފާއުވާ ނިޒާމްތައް ބޭނުންކޮށްގެން އެ މިސައިލް ވަނީ ވައިގެ ތެރޭގައި ގޮއްވާލާފައެވެ.

ހޫތީން ބުނީ އިޒްރޭލަށް އަމާޒުކޮށް ބެލެސްޓިކް މިސައިލުންނާއި ވިންގެޑް މިސައިލް އަދި ޑްރޯންއިން ހަމަލާތައް ފޮނުވާލާފައިވާ ކަމަށެވެ. އެހެން ނަމަވެސް މިއިން އެއްވެސް މިސައިލެއް އަދި އިޒްރޭލާ ހަމައަށް ފޯރިކަމުގެ ރިޕޯޓެއް ލިބިފައެއް ނުވެއެވެ.

އިޒްރޭލުން ބުނެފައި ވަނީ، އިޒްރޭލަށް އަމާޒުކޮށް ފޮނުވާލާފައިވާ މިސައިލްތަކެއް ރަތްކަނޑުގެ މަތިން ގޮއްވާލާފައިވާ ކަމަށެވެ. އަދި މިހާތަނަށް އެއިން އެއްވެސް މިސައިލެއް އިޒްރޭލުގެ ސަރަހައްދަކަށް ވެއްޓިފައި ނުވާކަމުގައިވެސް އިޒްރޭލުގެ އަސްކަރިއްޔާއިން ވަނީ ބުނެފައެވެ.