އިޒްރޭލު މީހުންނާއި އެ ޤައުމުގެ ޕާސްޕޯޓު އޮންނަ އެއްވެސް މީހަކު އެ ރަށަށް ނޭރޭ ގޮތް ހަދައިދިނުމަށް މަތިވެރި ކައުންސިލުން ކަމާ ބެހޭ އިދާރާތަކަށް ގޮވާލައިފިއެވެ.

މަތިވެރި ކައުންސިލުން އިއްޔެ ފާސްކުރި ގަރާރުގައި ބުނެފައި ވަނީ މުސްލިމުންގެ ފުރަތަމަ ގިބުލަ ކަމުގައިވާ މަސްޖިދުލް އަގުސާ އެ ބިމަކަށް ނިސްބަތްވާ ފަލަސްތީނުގެ ބިން ފޭރިގަނެ އެތަނުގައި ދިރުއުޅޭ މުސްލިމުންނާ ދެކޮޅަށް އިޒްރޭލުން ހިންގާ ބޮޑެތި ޖަރީމާތަކަކީ ފަލަސްތީނު އިސްތިއުމާރުކޮށް އެތަނުން މުސްލިމުންގެ ނަސްލު ނައްތާލުމަށް ހިންގަމުންގެންދާ ހުރުމަތާ ހިލާފު ކަންތައްތަކެއް ކަމަށެެވެ. އެހެންކަމުން މުސްލިމުންގެ މުގައްދަސް ބިމަކަށް އަރައިގަނެ މުސްލިމު އަޚުންނާއި އުޚުތުންތަކަކަށް މިފަދަ ލާއިންސާނީ އަނިޔާތަކެއް ދެމުންދާ ޔަހޫދީ އިސްތިރުމާރީންނަށް މިރަށުގެ ވެށިން އަމާންކަމާއި ހިޔާވަހިކަން ދޭކަށް އެއްވެސް ރައްޔިތަކުން ނޭދޭކަމަށެވެ. 

އިޒްރޭލުގެ މީހުން މަތިވެރިއަށް ގޮސް އުޅުމަކީ އެރަށުގެ އަމާންކަމާއި ސަލާމަތަށް ވެސް އޮތް ނުރައްކަލެއް ކަމަށް ގަބޫލު ކުރާ ކަމަށް ވެސް ކައުންސިލް މެންބަރުންގެ އިއްތިފާގުން ފާސްކުރި ގަރާގައި ބުނެފައިވެއެވެ.

"މިހެންކަމުން ފަލަސްތީނުގެ ބިން ފޭރިގަނެގެން އުފައްދާފައިވާ ޔަހޫދީ ދައުލަތެއް ކަމަށް ދައުވާ ކުރާ "އިސްރާއީލް" ގެ ޕާސްޕޯޓު އޮތް އެއްވެސް މީހަކު މިރަށަށް އެރުވުމަށް މި ކައުންސިލުން ނުރުހެމެވެ،" ގަރާރުގައި ބަޔާންކޮށްފައިވެއެވެ.

މަތިވެރި އަކީ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރި ކުރާ ރަށެކެވެ. ކައުންސިލުން ފާސްކުރި ގަރާރުގައި ވަނީ އެރަށުގައި ފަތުރުވެރިކަމުގެ ވިޔަފާރި ކުރާ ފަރާތަތަކުން ވެސް އިޒްރޭލަށް ނިސްބަތްވާ މީހުން އެރަށަށް ނުގެންދިއުމަށް އެދިފައެވެ. އަދި, އެރަށަށް އިޒްރޭލުގެ ޕާސްޕޯޓު އޮންނަ އެއްވެސް މީހަކަށް ނޭރޭ ގޮތަށް ހަދައިދިނުމަށް ދައުލަތުގެ ކަމާބެހޭ އިދާރާތަކަށް ވެސް މަތިވެރި ރައްޔިތުންގެ ނަމުގައި އެރަށު ކައުންސިލުން ވަނީ ގޮވާލައިފައެވެ.