އައްޑޫ ސިޓީއިން ދޫކުރާ ގޯތިތައް އަންނަ މަހުން ފެށިގެން ދޫކުރަން ފަށާނެކަމަށް އައްޑޫ ސިޓީ ކައުންސިލުން ވިދާޅުވެއްޖެއެވެ. އައްޑޫގެ 4 އަވަށުން ގޯތި ދޫކުރުމަށް ވަނީ ހަމަޖެހިފައެވެ. 

އަހަރުތަކަކަށްފަހު އައްޑޫ ސިޓީން ގޯތި ދޫކުރުމަށް ހުޅުވާލީ މިއަހަރުގެ ޖެނުއަރީމަހުއެވެ. އެފަހަރު އައްޑޫ ސިޓީގެ އެކި ރަށްތައް ހިމެނޭހެން 1000ގޯއްޗަށް ހުޅުވާލިއެވެ. އައްޑޫ ސިޓީން ގޯތި ލިބޭ މީހުންގެ ލިސްޓް ނެރެފައިވަނީ އޯގަސްޓްމަހުގެ ތެރޭގައެވެ.

ފުރަތަމަ އިއުލާންކުރީ 1000 ގޯތި ދޫކުރުމަށެވެ. އެއީ ހިތަދޫން 1500 އަކަފޫޓުގެ 500 ގޯތި، ފޭދޫން 1500 އަކަފޫޓުގެ 300 ގޯތި، ހުޅުދޫން 2000 އަކަފޫޓުގެ 100 ގޯތި އަދި މީދޫން 2000 އަކަފޫޓުގެ 100 ގޯއްޗެވެ.

ނަމަވެސް, ފަހުން ސިޓީ ކައުންސިލުން ވަނީ ޝަރުތުހަމަވާ އެންމެންނަށް ގޯތި ދޭން ނިންމާ މިދިޔަ އޮގަސްޓުގައި ލިސްޓުތައް އިއުލާންކޮށްފައެވެ. އެގޮތުން ގޯއްޗަށް ހުށަހެޅި 4160 މީހުންގެ ތެރެއިން ޝަރުތު ހަމަވީ 3997 މީހުންނަށް ގޯތި ދޭން ނިންމާ ވަގުތީ ލިސްޓު ކައުންސިލުން އާންމުކުރިއެވެ.

އެކި ފިޔަވަހިތަކަށް ބަހާލައިގެން ކުރިއަށްގެންދާ މިމަސައްކަތުގެ ތެރެއިން އެންމެ ފުރަތަމަ ދޭނީ، މިހާރު އިޢުލާންކޮށްފައިވާ 4 އަވަށުން ޖުމްލަ 1000 ގޯއްޗެވެ. އެއީ ހިތަދޫން 500 ގޯތި، ފޭދޫން 300 ގޯތިި ހުޅުދޫން 100 ގޯތި އަދި މީދޫން 100 ގޯއްޗެވެ.

ގޯތި ދޫކުރަން އިއުލާންކުރި ރަށްތަކުގެ ތެރެއިން ބިން ހިއްކުމުގެ މަސައްކަތް ނިމިފައި ވަނީ ހިތަދޫގައެވެ. ފޭދޫގެ ބިން ހިއްކުމުގެ މަސައްކަތް ކުރީ ސަރުކާރުގައި ނިންމާލައިފިއެވެ. ހުޅުދޫ އާއި މީދޫގެ ބިން ހިއްކުމުގެ މަޝްރޫއު ރާވައިފައިވީ ނަމަވެސް އަދި އެ މަސައްކަތް ކުރިއަށް ނުދެއެވެ.

މުޅި އައްޑޫ ސިޓީއަށް ބަލާއިރު ހިތަދޫން އެންމެ ފަހުން ގޯތި ދޫކޮށްފައިވަނީ މީގެ 21 އަހަރު ކުރިން 2002ވަނަ އަހަރުއެވެ. އަދި، ހުޅުދޫއާއި މީދޫންވެސް ގޯތިދޫނުކުރާތާ 15 އަހަރުވެފައިވާއިރު، ފޭދޫން ގޯތި ދޫނުކުރާތާ 25 އަހަރު ވަނީ ވެފައެވެ.