އިންތިޤާލީ މަރުހަލާގެ ރޫހަށް އިހްތިރާމްކުރުމަށް އިންތިޚާބީ ރައީސުލްޖުމްހޫރިއްޔާގެ އޮފީހުން ގޮވާލައިފިއެވެ.

އެ އޮފީހުން މިއަދު ނެރުނު ބަޔާނެއްގައި ބުނީ، އިންތިޤާލީ މަރުހަލާގައި ދައުލަތގެ ހަރުމުދަލާއި، ފައިސާއާގުޅޭ ވިޔަފާރީގެ މުއާމަލާތްތައް ހިންގުމުގައި ޤާނޫނީ އިންތަކުގެ ތެރެއިން ކަންކަން ކުރިޔަށް ގެންދިޔުމަށާއި އިންތިޤާލީ މަރުހަލާގެ ރޫހަށް އިހްތިރާމްކުރުމަށް އިލްތިމާސްކުރާ ކަމަށެވެ. 

އެބަޔާނުގައި ބުނެފައި ވަނީ، ދައުލަތުގެ ހަރު މުދަލާއި ފައިސާއާ ގުޅޭގޮތުން، ވިޔަފާރީގެ މުޅިން އާ މުއާމަލާތްތައް ހިންގަވާ ވިޔަފާރިިވެރިންނާއި އެންމެހާ ރައްޔިތުން ޤާނޫނީ އިންތަކުގެ ތެރެއިން އެފަދަ މުޢާމަލާތްތަކާ ގުޅޭ ކަންކަން ކުރިޔަށް ގެންދިޔުމަށް ޚާއްޞަ ސަމާލުކަމެއްދީ، ދައުލަތުގެ އެންމެހާ މުައްސަސާތަކާއި ސަރުކާރުގެ ކުންފުނިތަކުންވެސް ޤާނޫނާއި ޤަވާިއދާއި އެއްގޮތަށް ކަންކަން ކުރުމަށް އެފަރާތްތަކަށް ބާރުއަޅައި ދިނުމަށް އެދޭ ކަމަށެވެ. އަދި އެފަދަ މުއާމަލާތްތައް އަވަސްއަރުވާލައިގެން ނިންމުމަށް މަސައްކަތްކުރުމުގެ ބަދަލުގައި، ރައްޔިތުންގެ ނިންމުމަށާއި އިންތިޤާލީ މިމަރުޙަލާގެ ރޫޙަށް އިޙްތިރާމްކޮށް ކަމޭހިތުން އިސްކުރުމަށް ހުރިހާ ފަރާތްތަކަށް އިލްތިމާސްކުރާ ކަމުގައވެސް އެބަޔާނުގައި ބުނެފައިވެއެވެ.

އިންތިޚާބީ ރައީސުލްޖުމްހޫރިއްޔާގެ އޮފީހުން މީގެ ކުރިން ނެރުނު ބަޔާނެއްގައި ވަނީ، އަރބަންކޯއިން ހުޅުމާލޭގެ ވިޔަފާރި ބިންތަކާއި ގުޅޭ މުއާމަަލާތްތަކެއް ހިންގަމުންދާތީ އެކަމުގެ ކަންބޮޑުވުން ފާޅުކޮށްފައެވެ.