ނުނިމި ދިގުލައިގެން ގޮސްފައިި އޮތް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލްގެ މަޝްރޫއު، އެންމެ ލަސްވެގެން އަންނަ ސެޕްޓެމްބަރަށް ނިންމޭނެ ކަމުގެ ޔަގީންކަން އެބައޮތް ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިހެން ވިދާޅުވީ، މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އާއި ނެޝަނަލް ފެޑެރޭޝަން އޮފް މޯލްޑިވިއަން އެމްޕްލޯޔާސް (އެންއެފްއެމްއީ) ގުޅިގެން އިންތިހާބީ ރައީސަށް މަރުހަބާ ދެންނެވުމަށް ރޭ ހޮޓެލް ޖެންގައި ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.

މި ޖަލްސާގައި މުއިއްޒު ވިދާޅުވީ ރާއްޖޭގެ އިގްތިސާދު މިހާރު އޮތް ހިސާބުން ކުރިއަށް ގެންދަން ގިނަ މަސައްކަތްތަކެއް ކުރަން އެބަހުރި ކަމަށެވެ. އެކަމުގައި އެންމެ މުހިންމު ކަމަކީ، މުއިއްޒު ވިދާޅުވި ގޮތުގައި، ވީއައިއޭ ތަރައްގީކުރާ މަޝްރޫއު ނިންމުމެވެ.

އިންތިޤާލީ މަރުޙަލާގެ ކަންކަން ކުރިއަށްގެންދާ ކޮމިޓީތަކުން އެއްކުރެވިފައިވާ މަޢުލޫމާތުތަކުން ދައްކާގޮތުން މިމަސައްކަތް މިހާރު ކުރިއަށްދާ ޝެޑިއުލްގެ ދަށުން ނިންމާލެވޭނެކަމަށް ލަފާކޮށްފައިވަނީ 2025 އަހަރުގެ ޖުލައިމަހުކަމަށް އިންތިޚާބީ ޑރ.މުއިއްޒު ވިދާޅުވިއެވެ. ޑރ.މުއިއްޒު ވިދާޅުވީ އެއަރޕޯޓްގެ މަސައްކަތް އަވަސްކުރަންޖެހޭކަމަށާއި އެމަނިކުފާނު އަމާޒަކީ އަންނަ ސެޕްޓެމްބަރަށް އެއަރޕޯޓްގެ މަސައްކަތް ނިންމާލުންކަމަށް ޑރ.މުޢިއްޒު ވިދާޅުވިއެވެ.  

"އެކަން ކުރުމުގައި މިހާރުު ވެސް އަޅުގަނޑުމެން މި ވަނީ މަސައްކަތްތަކެއް ފަށާފައި. ޔަގީންކަން އެބައޮތް އަޅުގަނޑުމެންނަށް މިކަމާ ގުޅޭ ހުރިހާ ފަރާތްތަކާ ގުޅިގެން ކުރެވޭ މަސައްކަތްތަކުގައި އަދި ތިޔަބޭފުޅުން އެކަމުގައި ދެއްވާ ތަރުހީބާ އެކީގައި އެކަން އަޅުގަނޑުމެން ކާމިޔާބު ކުރާނަން،" މުއިއްޒު ވިދާޅުވިއެވެ.

ވީއައިއޭގެ އާ ޓާމިނަލް އިމާރާތް ކުރަން ހަވާލުކުރީ ސައުދި އަރަބިއްޔާގެ ބިން ލާދިން ގްރޫޕާއެވެ. އެ ކުންފުނިން އެ މަސައްކަތް ކުރަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އާ ހަވާލުކޮށްގެންނެވެ. އެ ޓާމިނަލް އަވަހަށް ނިންމަން އިތުރު 100 މިލިއަން ޑޮލަރުގެ ލޯނެއް ދޭން ސައުދީއިން ވަނީ މިފަހުން ނިންމާފައެވެ.