މެންޗެސްޓަރ ޔުނައިޓެޑްގެ އޯލްޑް ޓްރެފަޑްގައި ކުޅުނު ޑާބީ މެޗުން މެންޗެސްޓަރ ސިޓީ 3-0 ން މޮޅުވިއިރު، އާރލިން ހާލަންޑް ދެ ގޯލު ކާމިޔާބުކޮށް، އިންގްލިޝް ޕްރިމިއަރ ލީގުގެ ރެކޯޑެއް ހަދައިފިއެވެ. މި މޮޅާއެކު ސިޓީއިން މިވަނީ ލީގުގެ އެއްވަނައިގައި އޮތް ޓޮޓެންހަމާ 2 ޕޮއިންޓް ކައިރިއަށް ޖެހިލާފައެވެ. 

ޔުނައިޓެޑާ ދެކޮޅަށް ހާލަންޑް ކާމިޔާބުކުރި 2 ގޯލާއެކު އޭނާ މިވަނީ ޕްރިމިއަ ލީގުގައި، ރަށުން ބޭރުގައި އެންމެ އަވަހަށް އެންމެ ގިނަ ގޯލުޖެހި ކުޅުންތެރިޔާގެ ޝަރަފު ހޯދާފައެވެ. އެގޮތުން އޭނާ މިހާތަނަށް 23 މެޗުން ޖުމްލަ 20 'އަވޭ' ގޯލު ކާމިޔާބުކޮށްފައިވެއެވެ.

ހާލަންޑާއި ޖެހިގެން ދެން މި ލިސްޓްގައި އޮތީ ރަށުން ބޭރުގައި 28 މެޗުން 20 ގޯލު ކާމިޔާބުކުރި ކެވިން ފިލިޕްސްއެވެ. އެއަށްފަހު އިއާން ރައިޓް - 31 މެޗުން، ޑިއެގޯ ކޮސްޓާ - 33 މެޗުން އަދި އައުބަމަޔަންގް - 33 މެޗުން 20 ގޯލު ކާމިޔާބު ކޮށްފައިވެއެވެ.

މީގެ އިތުރުން މެންޗެސްޓަރ ޑާބީތަކުގައި އެންމެ ނުފޫޒުގަދަ ލިސްޓުގެ 5 ވަނައަށް ހާލަންޑް އަރާފައިމިވަނީ 3 މެޗުންނެވެ. މެންޗެސްޓަރ ޑާބީތަކުގައި އެންމެ ގިނަ ގޯލާއި އަދި އެސިސްޓް ކާމިޔާބުކޮށްފައިވާ ލިސްޓުގެ އެއްވަނައިގައި އޮތީ ޔުނައިޓޭޑްގެ ލެޖެންޑް ރްޔާން ގިގްސްއެވެ. އޭނާވަނީ 29 މެޗުން ޖުމްލަ ގޯލު އަދި އެސްޓުގެ އަދަދު 13 އާ ހަމަކޮށްފައެވެ. 

މި މެޗުގައި ހާލަންޑުގެ ފުރަތަމަ ގޯލު ފެނުނީ ފުރަތަމަ ހާފުގައެވެ. އެއީ ރޮޑްރީއަށް ކުރި ފައުލަކަށް ލިބުނު ޕެނަލްޓީއަކުން ކާމިޔާބުކުރި ގޯލެކެވެ. މިއީ އޯލްޑް ޓްރެފަޑްގައި 26 މެޗަށްފަހު، ސިޓީއަށް ޕެނަލްޓީއެއް ލިބުނު ފުރަތަމަ ފަހަރެވެ. ހާލަންޑުގެ 2 ވަނަ ގޯލު ފެނުނީ 2 ވަނަ ހާފުގައެވެ. މި ގޯލު ކާމިޔާބު ކުރުމަށް ހާލަންޑަށް އެހީވެދިނީ ބަނާޑޯ ސިލްވާއެވެ. 

ސިޓީގެ 3 ވަނަ ގޯލުގައި ވެސް ހާލަންޑްގެ ރޯލު ބޮޑެވެ. މި ގޯލު ފިލް ފޮޑަން ކާމިޔާބުކުރިއިރު، މިއީ ހާލަންޑަށް ވެސް ގޯލަށް ފޮނުވާލެވޭނެހާ ޖާގަ ތަނަވަސް ފުރުސަތެކެވެ.