އިނގިރޭސިވިލާތުގެ ލިވަރޕޫލް ފުޓުބޯޅަ ކުލަބަށް މިދިޔަ ސީޒަނުގައި ބަދަލުވި ކޮލްމަބިއާގެ ހަލުވި މިޑްފިލްޑަރ، ލުއިޒް ޑިއާޒްގެ މަންމަ އާއި ބައްޕަ ހޮނިހިރު ދުވަހު ކޮލަންބިއާގައި ރަހީނުކޮށްފިއެވެ. 

ކޮލަމްބިއާގެ ރައީސް ގުސްޓާވޯ ޕެޓްރޯ ހަމައެދުވަހު 'އެކްސް' ގައި ކުރި ޕޯސްޓެއްގައި ބުނެފައިވަނީ، ޑިއާޒްގެ މަންމަ ކޮލަމްބިއާގެ އުތުރުގެ ސަރަހައްދެއްކަމުގައިވާ ބަރަންކާސްއިން ސަލާމަތްކުރެވިފައިވާކަމަށެވެ. ނަމަވެސް ޑިއާޒްގެ ބައްޕަ އަދިވެސް ނުފެންނާތީ، އޭނާ ހޯދުމުގެ މަސައްކަތް ކުރިޔަށްދާކަމަށްވެސް ރައީސް ޕެޑްރޯ ހިއްސާކޮށްފައިވެއެވެ.

ކޮލަމްބިއާގެ މީޑިއާ ރިޕޯޓްތައް ބުނާގޮތުން، ޑިއާޒްގެ މަންމަ ސިލެނިސް މަރުލާންޑާ އަދި ބައްޕަ ލުއިޒް މަނުއަލް ޑިއާޒް ރަހީނުކޮށްފައިވަނީ ލަ ގުޖިރާ ކިޔާ ސަރަޙައްދެއްގައި އެމީހުން ތިއްބައެވެ. އަދި އެމީހުން ތިބީ ހަތިޔާރު ހިފައިގެން ކަމަށާއި، ޑިއާޒްގެ މަންމަ އާއި ބައްޕަ ރަހީނުކޮށްގެން ގެންދިޔައީ ސައިކަލުގައިކަމަށް ވެސް ހާމަކޮށްފައިވެއެވެ. 

ކޮލަމްބިއާގެ ޑިރެކްޓަރ އޮފް ޕޮލިސް މި މައްސަލައާއި ގުޅިގެން ބުނީ، މިކަން ރިޕޯޓު ކުރެވުނު ވަގުތުން ފެށިގެން މި މީހުން ހޯދުމަށް ޕޮލިހުގެ އިންޓެލިޖެންސް ޑިޕާޓްމަންޓާއި، ކަމާގުޅުންހުރި އެހެނިހެން ޑިޕާޓްމަންޓުތަކުން މަސައްކަތް ފަށާފައިވާކަމަށެވެ. 

މި ހާދިސާއާ ގުޅިގެން ލިވަޕޫލުންވެސް ވަނީ ކަންބޮޑުވުން ފާޅުކޮށްފައެވެ.