Advertisement
ތުރުކީގެ ރައީސް އެއްވުމުގެ ބައިވެރިންނާއިއެކު --
ތުރުކިޔޭއާއެކު ޤާއިމްކޮށްފައިވާ ހުރިހާ ގުޅުމެއް ކަނޑާލިކަން އިޒްރޭލުން އިއުލާންކޮށްފި
ތުރުކިޔޭއާއެކު ޤާއިމްކޮށްފައިވާ ސިޔާސީ ގުޅުން ކަނޑާލިކަން އިޒްރޭލުގެ ފޮރިން މިނިސްޓްރީން ހާމަކޮށްފިއެވެ.
ތުރުކިއާއެކު ޤާއިމްކޮށްފައިވާ ހުރިހާ ގުޅުމެއް ކަނޑާލިކަން އިޒްރޭލުން އިއްޔެ ހާމަކޮށްފައި ވަނީ އިޒްރޭލުން ޣައްޒާގެ އާއްމު ރައްޔިތުންނާއި ދެކޮޅަށް ހިންގަމުންދާ ޤަތުލްއާއްމުތަކާއި ގުޅިގެން ތުރުކިޔޭގެ ރައްޔިތުން އިސްތަންބުލްގައި އިޒްރޭލާއި ދެކޮޅަށް ވަރުގަދަ މުޒާހަރާތަކެއް ފަށާފައި ވަނިކޮށެވެ. ރުޅިއަރައިގެންފައިވާ އާއްމުން ވަނީ އިސްތަންބުލްގައި ހުންނަ އިޒްރޭލުގެ ކޮންސިއުލޭޓަށް ދެފަހަރެއްގެ މަތިން ހަމަލާދީފައެވެ. އަދި އިއްޔެ އިޒްރޭލާއި ދެކޮޅަށް އިސްތަންބުލްގައި ބޭއްވި، ބޮޑު އެއްވުމުގައި ތުރުކީގެ ރައީސް އުރުދުޣާން ބައިވެރިވެވަޑައިގެންނެވިއެވެ.
މިއެއްވުމުގައި ތުރުކިޔޭގެ މިލިޔަނަކަށްވުރެ ގިނަ މީހުން ބައިވެރިވިއިރު، މިބައްދަލުވުމުގައި ވާހަކަފުޅު ދައްކަވަމުން، ރައީސް އުރުދުޣާން ވަނީ އިޒްރޭލަށާއި ހުޅަނގުގެ ޤައުމުތަކަށް ވަރުގަދަ އިންޒާރުތަކެއް ދެއްވާފައެވެ. އެއްވުމުގެ ބައިވެރިންނާއި މުހާތަބު ކުރައްވައި އުރުދުޣާން ދެއްކެވި ވާހަކަފުޅުގައި ހުޅަނގުގެ ޤައުމުތަކުން ބޭނުންވަނީ މުސްލިމުންނާއި ޣައިރު މުސްލިމުންނާއި ދެމެދު އަލުން ބޮޑު ހަނގުރާމައެއް ފެށުންތޯ ވަނީ ސުވާލު ކުރައްވާފައެވެ. އަދި ޔޫކުރެއިން ހަނގުރާމައާ ޣައްޒާއަށް އިޒްރޭލުން ދެމުންދާ ހަމަލާތަކާއި މެދު ހުޅަނގުން ގެންގުޅޭ ތަފާތު ކުރުންތަކަށްވެސް އުރުދުޣާން ވަނީ ފާޑުވިދާޅުވެފައެވެ.
މިއެއްވުމުގައި އުރުދުޣާން ވަނީ، ޙަމާސް ޖަމާޢަތަކީ ޓެރަރިސްޓް ޖަމާޢަތެއްކަމުގައި ހުޅަނގުގެ ޤައުމުތަކުން ސިފަކޮށް ދައްކާވާހަކަތަކަށް ރައްދުދެއްވައި ވަރުގަދަ ބަހުގެ ހަމަލާއެއް ދެއްވާފައެވެ. އުރުދުޣާން ވިދާޅުވީ، ޙަމާސް ޖަމާޢަތަކީ ޓެރަރިސްޓް ޖަމާޢަތެއް ނޫންކަމަށާއި، ޙަމާސް މަސައްކަތް ކުރަމުން ދަނީ ހިފާފައިވާ ފަލަސްޠީނުގެ ބިންތައް ހޯދައި ފަލަސްޠީނުގެ ރައްޔިތުންގެ ކިބައިން ނިގުޅައިގެންފައިވާ ހައްޤުތައް ހޯދުމަށް ކަމަށެވެ.
