ގާތްގަނޑަކަށް 48 ގަޑިއރުފަހުން ޣައްޒާއަށް އިންޓަނެޓާއި މުވާޞަލާތީ ޚިދުމަތްތައް އަލުން ލިބެން ފަށާފައިވާ ކަމުގައި އަލްޖަޒީރާއިން ރިޕޯޓްކޮށްފިއެވެ.

ހުކުރުދުވަހުގެރޭ އިޒްރޭލުގެ ހައްދުފަހަނަ އެޅި ސިފައިން އުތުރު ޣައްޒާއަށް 3 ދިމާލަކުން ވަދެގަތުމާއި ދިމާކޮށް، މުޅި ޣައްޒާއިން ވަނީ މުވާޞަލާތީ ޚިދުމަތްތައް ކަނޑާލާފައެވެ. ޣައްޒާއިން މުވާސަލާތީ ޚިދުމަތް ކަނޑާލީ އެކަމަށް އިޒްރޭލުން އިންޒާރު ދިނުމަށްފަހުގައި ނަމަވެސް ފަހުން އިޒްރޭލުން ވަނީ އެކަމަށް އިންކާރުކޮށްފައެވެ. އިޒްރޭލުގެ ހައްދުފަހަނައެޅި ސިފައިން ޣައްޒާއަށް ދެމުންދާ ވައިގެ ހަމަލާތަކާއި ގުޅިގެން އުތުރުގައްޒާ އެކީގައި ފުނޑުފުނޑުވެފައިވާ ކަމަށާއި، ކަރަންޓާއި ފެންކަނޑާލައި، ތެލާއި ބޭހާއި ކާބޯތަކެތި ޣައްޒާއަށް ވެއްދުމަށް އިޒްރޭލުން ހުރަށްއަޅާފައި ވުމާއިއެކު ޣައްޒާ އޮތީ އިންސާނީ ބޮޑު ކާރިސާއެއްގެ ތެރޭގައެވެ.

ހަމާސްއާދެކޮޅަށް ކަމަށް ބުނެ އިޒްރޭލުން ޣައްޒާއަށް އަރައިގަތުމާއި، ޣައްޒާއަށް ހުއްޓުމެއްނެތި ވައިގެ ހަމަލާތައް ދެމުން ދިޔުމަކީ، ދުނިޔޭގެ ކުރިމަތީގައި އިޒްރޭލުން ހިންގަމުން އަންނަ ޤަތުލުއާއްމެއް ކަމުގައިވެސް ދުނިޔޭގެ ޤައުމުތަކުން ދަނީ ބުނަމުންނެވެ. އަދި އިޒްރޭލުގެ ހަމަލާތައް ހުއްޓުވުމަށް ގޮވާލައި، ތުރުކީގެ އިސްތަންބުލްގަޔާއި، ފްރާންސްގެ ޕެރިހުގަޔާއި، އެމެރިކާގެ ނިއުޔޯކުގަޔާއި، އިނގިރޭސި ވިލާތުގެ ލަންޑަނުގަޔާއި، މިސްރުގެ ވެރިރަށް ޤާހިރާގަޔާއި، ލުބުނާނުގެ ވެރިރަށް ބެއިރޫތުގަޔާއި، ޕާކިސްތާނުގެ ވެރިރަށް އިސްލާމްއާބާދުގަޔާއި، އިންޑޮނީޝިއާގެ ޖަކާޓާގައި އެތައް މިލިޔަން ބަޔަކު ދަނީ އަޑުއުފުލައި މުޒާހަރާކުރަމުންނެވެ. އަދި އިޒްރޭލުގެ ހަމަލާތައް ހުއްޓާލުމަށް ގޮވާލައި، އދ.ގެ އާއްމު މަޖިލީހަށް ހުށައެޅި ޤަރާރު 120 ޤައުމުގެ ވޯޓާއި އެކު ފާސްކޮށްފައި ވާއިރު އެޤަރާރަށް ޢަމަލުކުރުމަށްވެސް އިޒްރޭލުން ވަނީ ދެކޮޅު ހަދާފައެވެ.

Advertisement

އިޒްރޭލުން މުޅި ޣައްޒާ ފުނޑުފުނޑުކޮށްލައި، ނަސްލު ނައްތާލުމަށް ޤަތުލުއާއްމުތައް ހިންގަމުންދާއިރު، އިޒްރޭލާއި ދެކޮޅަށް އަސްކަރީ ފިޔަވަޅުތަކާއި، އިޤުތިޞާދީ ދަތިކުރުމުގެ ފިޔަވަޅުތައް އެޅުމަށް ދުނިޔޭގެ ޤައުމުތަކުގައި ތިބި މުސްލިމުން ދަނީ އިސްލާމީ އުއްމަތުގެ ވެރިންނަށް ގޮވާލަމުންނެވެ.