މަޖިލީހަށް ހޮވޭ އަންހެނުންނަށް ޕާޓީގެ ފަރާތުން ހާއްސަ އެލަވަންސެއް ދޭ ގޮތަށް ހަމަޖައްސަން މަސައްކަތް ކުރައްވާނެ ކަމަށް ޕީއެންސީގެ ރައީސް އަދި އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. މުއިއްޒު މިހެން ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް-ޕީއެންސީން %20 ގޮޑިއަށް އަންހެނުން ވާދަކޮށް، އެ ކަމަށް ހިތްވަރު ދިނުމުގެ ގޮތުންނެވެ.

މުއިއްޒު ވިދާޅުވީ، ކުރިއަށް އޮތް މަޖިލިސް އިންތިހާބުގައި ވީހާ ވެސް ގިނަ އަންހެނުން ވާދަކޮށް، ހޮވުމަކީ ވަރަށް ބޮޑަށް އެދިވަޑައިގަންނަވާ ކަމެއް ކަމަށެވެ. އެގޮތުން، ޕީޕީއެމް-ޕީއެންސީން މަޖިލީހުގައި ތަމްސީލުކުރާ މަދުވެގެން %20 ގޮޑިތަކަކީ އަންހެނުން ކުރިމަތިލާ ގޮޑިތަކަކަށް ހެދުމަށް މުއިއްޒު އެދިވަޑައިގެންނެވިއެވެ. 

"މި ކަމަށް ހިތްވަރު ދިނުމުގެ ގޮތުން، ޕީޕީއެމް-ޕީއެންސީން މަޖިލީހަށް ހޮވޭ ކޮންމެ އަންހެން މެންބަރަކަށް މަޖިލީހުން ލިބޭ މުސާރަ އާއި އެލަވަންސްގެ އިތުރުން ޕާޓީން ހާއްސަ އެލަވަންސެއް ދޭ ގޮތަށް ހަމަޖައްސަން އަޅުގަނޑު މަސައްކަތް ކުރާނެ ވާހަކަ ދަންނަވަން،" މުއިއްޒުގެ ޕޯސްޓުގައި ވިދާޅުވިއެވެ.

މިހާރު ހިނގަމުންދާ 19 ވަނަ މަޖިލީހުގެ ފަސް އަހަރުގެ ދައުރު އަންނަ 28 މެއިއަށް ހަމަވާނެއެވެ. މިހާރުގެ އިންތިހާބުގައި ޖުމްލަ 87 މެންބަރުން ތިއްބަވާ އިރު އޭގެތެރެއިން އަންހެނުންގެ އަދަދަކީ އެންމެ ފަހެކެވެ. 

ގާނޫނުގައިވާ ގޮތުން، 29 އޭޕްރީލްގެ ކުރިން އާ ދައުރަކަށް މެމްބަރުން އިންތިހާބުކޮށް ނިންމަން ޖެހެއެވެ. އިލެކްޝަންސް ކޮމިޝަނުން ބުނެފައިވާ ގޮތުން، އެ އިންތިހާބު ބޭއްވޭނެ ކަމަށް ލަފާ ކުރެވެނީ އަންނަ މާޗު މަހުގެ ފަހުކޮޅު ނުވަތަ އޭޕްރީލް މަހުގެ ކުރީ ކޮޅުކަމަށެވެ.