ޔަހޫދީ އިޒްރާއީލުން ފަލަސްޓީނުގެ ގައްޒާއަށް ދެމުންދާ ލާއިންސާނީ ހަމަލާތަކުން ހާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީވުމަށް ދިވެހިން 24 މިލިއަނަށްވުރެ ގިނަ ރުފިޔާ ހަދިޔާކޮށްފިއެވެ. 

ރާއްޖޭގެ ހުރިހައި ރަށެއްގައިވެސް ވަނީ ފަންޑް ރައިޒިން އިވެންޓްތައް ބާއްވާފައެވެ. އަދި އަމިއްލަ ބައެއް ފަރާތްތަކުން އިސްވެ ވެސްވަނީ ދީލަތި އެހީތެރިކަން ފޯރުކޮށްދީފައެވެ. މި ހުރިހައި ފައިސާއެއް ހަވާލުކޮށްފައިވަނީ އިންޓަނޭޝަނަލް އެއިޑް ކެމްޕޭން، އައިއޭސީންއަށެވެ.

އައިއޭސީން ބުނީ މިހާތަނަށް ފަލަސްޠީނަށް އެހީވުމަށް 23.9 މިލިއަން ރުފިޔާ ލިބިފައިވާކަމަށެވެ. އަދި 13،000 ޑޮލަރު ލިބިފައިވާކަމަށްވެސް އެ ޖަމިއްޔާއިން ވަނީ ބުނެފައެވެ.

ދިވެހިން ހަދިޔާ ކުރާ މި ފައިސާއިން މިހާތަނަށް ފަލަސްތީނުގެ ރައްޔިތުންނަށް އެކި އެހީތައް ފޯރުކޮށްދީފައިވާ ކަމަށް އައިއޭސީން ބުންޏެވެ. އޭގެތެރޭގައި ހަމަނުޖެހުންތަކުގެ ކުރީކޮޅު، ކާބޯތަކެއްޗާއި ތެލާއި ޒަރޫރީ ބައެއް ސާމާނު ވަނީ ބަހާފައެވެ. އޭގެފަހުން ގިނަ އަދަދެއްގެ ހޮޓްމީލް، އާއްމުންނާއި ހޮސްޕިޓަލުތަކުގައި މަސައްކަތް ކުރާ މީހުންނަށް ފޯރުކޮށްދިނެވެ. އަދި އާއިލާތަކުގެ އެދުމުގެ މަތިން 200 އާއިލާއަކަށް، ކޮންމެ އާއިލާއަކަށް 500 ޑޮލަރުގެ މަގުން، ޖުމްލަ 100،000 ޑޮލަރު (1.5 މިލިޔަން ރުފިޔާ) ބަހާފައިވެއެވެ.

މި މަހުގެ 7ގައި، ހަމާސްގެ ހަނގުރާމަވެރިން ކުއްލިއަކަށް އިޒްރޭލަށް ވަދެގަނެ ދިން ހަމަލާތަކާއި ރޮކެޓް ހަމަލާތަކުގެ ބަދަލު ހިފުމުގެ ގޮތުން، މެދުކެނޑުމެއް ނެތި އިޒްރޭލުން ދެމުންދާ ހަމަލާތަކުގައި މިހާތަނަށް ފަލަސްތީނުގެ 7،000އަށް ވުރެ ގިނަ މީހުން ވަނީ މަރުވެފައެވެ. އަދި 18،000އަށް ވުރެ ގިނަ މީހުން ވަނީ ޒަހަމްވެފައެވެ.