ކަޅުފައިސާ ދޮވުމާއި، ކޮރަޕްޝަނުގެ މައްސަލަތަކުގެ ކުށް ސާބިތުވެ ރައީސް ޔާމީނުގެ މައްޗަށް އިއްވާފައިވާ ހުކުމް ރަށު ބަންދަކަށް ސަރުކާރުން ލުއިކޮށްދީފިއެވެ.

ރިޔާސީ އިންތިޚާބު، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ކާމިޔާބު ކުރެއްވުމާއިއެކު، ސަރުކާރުން ވަނީ، ރައީސް ޔާމީން ޖަލުބަންދުން ގޭބަންދަށް ބަދަލުކޮށްދީފައެވެ. އަދި ސަރުކާރުން ބުނެފައި ވަނީ ރައީސް ޔާމީންގެ ބަންދަށް ލުއިތައް ދީފައި ވަނީ ސިއްޙީ ސަބަބުތަކަށްޓަކައި ކަމަށެވެ.

ރައީސް ޔާމީނުގެ ބަންދު މާލެ ބަންދަށް އިއްޔެ ބަދަލު ކުރި އިރު އެމަނިކުފާނު މިނިވަން ކުރުމަށް ގޮވާލައި، ޕީޕީއެމްއިން ދަނީ މުޒާހަރާތައް ކުރަމުންނެވެ. އަދި އިންތިޚާބީ ރައީސް ޑރ. މުޙައްމަދު މުޢިއްޒުއަށާއި، ޕީއެންސީއަށް ޕީޕީއެމްއިން ގެންދަނި ފިއްތުންތައް ކުރިމަތި ކުރަމުންނެވެ.

ރައީސް ޔާމީން ޖަލު ބަންދުން ގޭބަންދަށް ބަދަލުކޮށްފައި ވަނީ އޮކްޓޫބަރު މަހުގެ 3 ވަނަ ދުވަހުގައެވެ. އެމަނިކުފާނު ބަންދުން މުޅިން ދޫކޮށްލުމަށް ޕީޕީއެމްގެ ސަޕޯޓަރުން ގޮވާލަމުން ދިޔަ ނަމަވެސް އިންތިޚާބީ ރައީސް ޑރ މުހައްމަދު މުޢިއްޒު ވަނީ، ސަޕޯޓަރުން އެދޭހައި އަވަހަށް، ރައީސް ޔާމީން މުޅިންް މިނިވަން ނުކުރެވޭނެ ކަމުގެ އިޝާރާތެއް ކޮށްފައެވެ.

ވ.އާރަށް ކުއްޔަށް ދިނުމުގައި ރައީސް ޔާމީން ރިޝްވަތު ނެންގެވި ކަމަށް ތުހުމަތު ކުރެވި ކުރެވުނު ދައުވާ ސާބިތުވެ އެ މައްސަލާގައި ޔާމީންގެ މައްޗަށް 11 އަހަރަށް ޖަލަށް ލުމަށާއި، 5 މިލިޔަން ޑޮލަރުން ޖޫރިމަނާކުރުމަށް ނިންމައި ޙުކުމް، 2022 ޑިސެމްބަރު 25 ގައެވެ.