ހުކުރު ދުވަހުގެ ރޭ ކްރިސްޓަލް ޕެލެސް 2-1 ން ބަލިކުރުމަށްފަހު، މި ސީޒަނުގައި ފެށުން ރަގަޅުކޮށްފައިވާ ޓޮޓެންހަމް ހޮޓްސްޕާ އިން 5 ޕޮއިންޓުގެ ލީޑަކާއެކު، އިންގްލިޝް ޕްރިމިއަ ލީގުގެ އެއްވަނައިގައި ރަގަޅަށް ހަމަޖެހިލައިފިއެވެ. މިއީ 1960-61 ގެ ސީޒަނަށްފަހު، ދެވަނައިގައި އޮތް ޓީމާ މިހާ ބޮޑު ފަރަގަކާއެކު ލީގުގެ އެއްވަނައިގައި ސްޕާސް އޮތް ފުރަތަމަ ފަހަރެވެ. އެ ސީޒަނުގައި، ލީގުގެ ދެވަނައިގައި އޮތް ޓީމާ ދެމެދު 8 ޕޮއިންޓުގެ ލީޑެއް ހޯދާ، ސްޕާސްއިން ވަނީ ތަށި އުފުލާލާފައެވެ.

މި މެޗުގެ ގޯލުތައް ފެނިގެން ދިޔައީ ދެވަނަ ހާފުގައެވެ. އެގޮތުން ސްޕާސްގެ ފުރަތަމަ ގޯލަކީ ގޯލު ކުރިމައްޗަށް ސްޕާސްގެ ޖޭމްސް މެޑިސަން ކުރި ހުރަހަކުން، ޕެލެސްގެ ވާޑް އަތުން ބައިކޮޅަށް ވަތް ގޯލެކެވެ. އޭގެ 13 މިނެޓުފަހުން ސްޕާސްގެ ލީޑު ފުޅާކޮށްދިނީ ސަން ހިޔުންގް-މިން އެވެ. މިއީ މި ސީޒަނުގައި ސަން ކާމިޔާބުކުރި 8 ވަނަ ގޯލެވެ. ޕެލެސްގެ ގޯލު ކާމިޔާބުކުރީ މެޗުގެ އިތުރު ވަގުތުގައެވެ. މިއީ މެއިން ކޮންޓްރޯލް ކޮށްލުމަށްފަހު، ގޯލު ތެރެއަށް ރީތި ބޯޅައެއް ފޮނުވާލައިގެން ޖޯޑަން އައިޔު ކާމިޔާބުކޮށްދިން ގޯލެކެވެ.

މި ސީޒަނުގައި ސްޕާސްއިން ދައްކަމުން މި އަންނަ މޮޅުކުޅުމުގެ ފަހަތުގައިވާ އެކަކީ މިދިޔަ ޓްރާންސާގައި ލެސެސްޓަރ ސިޓީއިން އެ ޓީމަށް ބަދަލުވި މެޑިސަންއެވެ. ޕެލެސްއާ ދެކޮޅަށް ކުޅުނު މެޗުގެ ދެ ގޯލުގައިވެސް އޭނާގެ ހިއްސާ ބޮޑެވެ. މެދުން ކިރިޔާ ވެސް ހުސްޖާގައެއް ލިބިއްޖެނަމަ، އިދިކޮޅު ޓީމުގެ އޭރިޔާތެރެއަށް އޭނާ އަންނަނީ ނުރައްކާތެރި ބޯޅަތައް ކުޅެމުންނެވެ. މިއާއެކު ދަނޑުމަތީގައި މެޑިސަން އަދި ސަން ގެ ބަދަހިކަމަކީ ބޮޑެތި ޓީމުތައް ބިރުގަންނަންޖެހޭކަމެއްކަން މި ދެ ކުޅުންތެރިން މި އަންނަނީ ސާބިތުކޮށްދެމުންނެވެ.

މި މޮޅާއެކު 10 މެޗުން ސްޕާސް އަށް ލިބިފައިމިވަނީ ޖުމްލަ 26 ޕޮއިންޓެވެ. އަދި މި ސީޒަނުގައި މިހާރު ބަލިނުވެ އޮތް ދެ ޓީމުގެ ތެރެއިން އެއްޓީމަކީ ވެސް ސްޕާސްއެވެ. ދެން އޮތީ އާސެނަލްއެވެ.

މި ހަފްތާގައި ކުޅޭ މެޗުތަކުން އާސެނަލް އަދި މެންޗެސްޓަރ ސިޓީ މޮޅުވެއްޖެނަމަ މި ލީޑު އަނެއްކާވެސް 2 ޕޮއިންޓަށް ކުޑަވާނެއެވެ. މި ހަފްތާގައި އެމިރޭޓްސް ސްޓޭޑިއަމްގައި އާސެނަލް ނިކުންނާނީ ޝެފީލްޑް ޔުނައިޓެޑާ ދެކޮޅަށެވެ. އަދި މެންސިޓީ ނިކުންނާނީ އޯލްޑް ޓްރެފަޑްގައި ޔުނައިޓެޑާ ދެކޮޅަށެވެ.