ޣައްޒާއަށް އިޒްރޭލުން ހަމަލާތައް ދޭންފެށި ފަހުން މިރެއަކީ އެންމެ ވަރުގަދައަށް ބޮން އަޅަމުންދާ ރޭ ކަމަށާއި، ކަނޑު އުޅަނދުތަކާއި މަތިންދާ ބޯޓުތަކުން އުތުރު ޣައްޒާއަށް ބޮން އަޅަމުންދާކަމުގައި، ޚަބަރުތައް ބުނެފިއެވެ. އިރު އޮއްސި އަނދިރިވުމާއެކު، ކަރަންޓްގެ އެއްވެސް އަލިކަމެއް، ނެތް ޣައްޒާއަށް ކޮންމެ ރެޔަކުވެސް އިޒްރާއީލުން ބޮންއަޅައެވެ.

އަލްޖަޒީރާއާއި ގާޒާޓައިމްސްއިން ރިޕޯޓްކޮށްފައިވާ ގޮތުގައި އުތުރު ގާޒާއިން މުވާސަލާތީ ހުރިހާ ޚިދުމަތެއް ވަނީ ކަނޑާލާފައެވެ. އަދި ކަރަންޓާއި ފެންކަނޑާލިތާވެސް އެތައް ދުވަހެއް ވެފައި ވާއިރު، އުތުރު ޣައްޒާ އޮތީ އެއްވެސް ޚަބަރެއް ނުލިބޭ ހާލަތުގައި ކަޅު އަނދިރިކަމުގައި ކަމަށްވެސް މައުލޫމާތު ލިބެއެވެ.

އިޒްރޭލުން އުތުރު ގާޒާއަށް އަޅަމުން ދަނީ، ބިންގަރާސްތައް ހަލާކުކޮށްލާފަދަ ބާރުގަދަ ބޮންކަމަށް ބެލެވިފައިވާއިރު، އުތުރު ޣައްޒާއަށް އަޅާ ބޮންތަކާއެކު މުޅި އުދަރެސް ދިއްލިގެންދާ މަންޒަރު، އިޒްރޭލުގެ މެދުތެރޭ އޮންނަ އަސްޣަލާންއަށްވެސް ފެންނަ ކަމުގައި ރިޕޯޓްތައް ބުނެއެވެ.

Advertisement

ރިޕޯޓްތައް ބުނާ ގޮތުގައި އުތުރު ޣައްޒާއަށް މިއަދު އެއްގަމު މަގުން އިޒްރޭލުގެ ބައެއް ސިފައިންވެސް ވަނީ ވަދެފައެވެ. އަދި ހަނގުރާމައިގައި އިޒްރޭލަށް ވާގިވެރިވުމަށް އެމެރިކާއިން ވަނީ އިޒްރޭލަށް 900 ޓްރޫޕް ސިފައިންނާއި، 2 އެއާ ޑިފެންސް ސިސްޓަމާއި ދެ މަނަވަރުވެސް ފޮނުވާފައެވެ.

އިޒްރާއީލުގެ ހަމަލާތަކާއި އެކު މެދުއިރުމައްޗަށް ހަނގުރާމަ ފުޅާވެގެން ހިނގައިދާނެ ކަމުގެ ބިރު ވަނީ ބޮޑުވެފައެވެ.