ޔޫއެފާ ޔޫރޮޕާ ލީގުގައި ބުރާސްފަތި ދުވަހުގެރޭ ނެދަލޭންޑްސްގެ އަޔެކްސް އާއި ބައްދަލު ކުރި މެޗު 2-1 އިން ކާމިޔާބުކޮށް، އިނގިރޭސި ޕްރިމިއަރ ލީގުގެ ބްރައިޓަންއިން ތާރީހީ މޮޅެއް ހޯދައިފިއެވެ. މިއީ ޔޫރަޕްގެ ޓީމުތަކުގެ މެދުގައި ކުޅޭ މުބާރާތެއްގައި ބްރައިޓަން މޮޅުވި ފުރަތަމަ މެޗެވެ. މި މޮޅާއެކު ނޮކް-އައުޓް ބުރަށް ދިއުމުގެ ފުރުސަތު ބްރައިޓަންއަށް ވެސް އެބައޮތެވެ.

މި ސީޒަންގެ ޔޫރޮޕާ ލީގުގެ ފުރަތަމަ މެޗުގައި އޭއީކޭ އެތެންސް އާ ބައްދަލުކުރި މެޗުން ބްރައިޓަން ބަލިވި ނަމަވެސް، ދެވަނަ މެޗުގައި މާސޭއާ އެއްވަރުކޮށް އެ ޓީމުންވަނީ ޕޮއިންޓެއް ހޯދާފައެވެ. އަދި އަޔެކްސް މެޗުން ލިބުނު 3 ޕްއިންޓާއެކު، ބްރައިޓަން މިހާރު އޮތީ ގްރޫޕްގެ 3 ވަނައިގައެވެ.

ބްރައިޓަންއިން ކާމިޔާބުކުރި ދެ ގޯލު ކާމިޔާބުކޮށްފައިވަނީ މެޗުގެ ދެ ހާފުގައެވެ. އެގޮތުން އެމީހުންގެ ފުރަތަމަ ގޯލު މެޗުގެ 42 ވަނަ މިނެޓުގައި ކާމިޔާބުކުރީ ޖާއޯ ޕެޑްރޯއެވެ. މިއީ ޔޫރޮޕާ ލީގުގައި އޭނާ ޖެހި 4 ވަނަ ގޯލެވެ. އަދި އެމީހުންގެ ދެވަނަ ގޯލު ކާމިޔާބުކުރީ ދެވަނަ ހާފު ފަށައިގެން މާގިނައިރުތަކެއް ނުވެ، މެޗުގެ 53 ވަނަ މިނެޓުގައި އަންސޫ ފާޓީއެވެ.

މުބާރާތުގެ ފުރަތަމަ މޮޅުގެ އިތުރުން، އަޔެކްސް ބަލި ކުރެވުމަކީ ބްރައިޓަންއަށް ވަރަށް ތާރީހީ ކަމެކެވެ. ސަބަބަކީ އަޔެކްސް އިން 1994-95 ސީޒަނުގައި ޔޫރަޕިއަން ކަޕް ނެގި އިރު، ބްރައިޓަން ކުޅުނީ އިނގިރޭސި 3 ވަނަ ލީގުގައެވެ. އެ ސީޒަން އެމީހުން ނިންމާލީ 16 ވަނައިގައެވެ. އެހެންކަމުން، މި މޮޅުން ރަމްޒުކޮށްދެނީ ފާއިތުވި 30 އަހަރުގެ ތެރޭގައު އެ ޓީމުން ހޯދާފައިވާ ބޮޑު ކުރިއެރުމެވެ.